Հայաստանի ազգային հավաքականի մարզիչը՝ «Մենք խաղում էինք դատարկ բենզինի բաքով, այդ պատճառով էլ այդպիսի հաշիվ եղավ»

Կոսովոյի հավաքականից կրած խոշոր հաշվով պարտությունից հետո (2:5) Հայաստանի ազգային հավաքականի գլխավոր մարզիչ Ջոն վան տ’ Շիպը մամուլի ասուլիսում հանդես եկավ խաղի համապարփակ վերլուծությամբ, խոսեց անհաջողության պատճառների, ֆուտբոլիստների ֆիզիկական վիճակի ու կադրային խնդիրների մասին:

Ահա ինչ ասաց հոլանդացի մասնագետը մամուլի ասուլիսում.

Խաղի ընթացքի և պարտության պատճառների մասին.
«Խաղի առաջին ժամվա ընթացքում լավ տեսք ունեինք և վերահսկում էինք խաղի ընթացքը։ Այնուհետև տեղի ունեցավ խախտումը և մեր դարպասին նշանակված 11 մետրանոցը։ Դրանից հետո սկսեցինք անհատական շատ սխալներ թույլ տալ, նաև դադարեցինք պահել խաղի տեմպը, ֆուտբոլիստներն ուժասպառ եղան»։

Ֆուտբոլիստների ֆիզիկական պատրաստվածության մասին.
«Խնդրի լուծումը կայանում է նրանում, որ բոլոր ֆուտբոլիստները իրենց ակումբներում պետք է բավարար խաղաժամանակ ստանան։ Տեսաք՝ ինչպես լավ սկսեց Սևիկյանը, բայց հետո պարզապես հոգնեց, նույնը Տիկնիզյանը։ Նրանք քիչ են խաղում իրենց ակումբներում և այժմ չեն կարող 90 րոպե բարձր մակարդակով խաղալ։ Արթուր Միրանյանը նույնպես քիչ է խաղում Ռումինիայում։ Հակոբ Համբարձումյանը նույնպես երկրորդ խաղակեսում շատ էր հոգնել։ Մենք ուզում էինք փոխարինել նրան մինչև 11 մետրանոցը, Կամոն արդեն պատրաստ էր դուրս գալ, բայց չհասցրինք»։

Կադրային ռոտացիայի և մրցակցության մասին.
«Երբ երեք օրվա ընթացքում երկու խաղ ունես, պետք է երկու հավասարակշռված կազմ ընտրել։ Նաև որոշել, թե ով է ամբողջ խաղը խաղալու։ Կոսովոյի և Վրաստանի հավաքականներում շատ ավելի շատ ֆուտբոլիստներ կան, ովքեր խաղում են ուժեղ լիգաներում և ունեն կայուն խաղային պրակտիկա։ Մեր մոտ միայն Ռուսաստանի Պրեմիեր Լիգայում ֆուտբոլիստներն են ստանում կայուն խաղաժամանակ, և դա էլ՝ ոչ բոլորը։ Միգուցե միակ բացառությունը Սպերցյանն է։ Պետք է, որ ավելի շատ ֆուտբոլիստներ խաղան ուժեղ լիգաներում ու ունենան պրակտիկա»։

Ինչու խաղաց Արթուր Միրանյանը.
«Պետք է ուշադրություն դարձնել նաև ֆուտբոլիստի որակներին։ Միրանյանն ունի հարձակվողի համար անհրաժեշտ որակներ և այս առումով գերազանցում է մյուսներին։ Թեև քիչ խաղաժամանակ է ստանում, կարող էր օգնել մեզ մնացած րոպեներին։ Ես պարզապես չեմ տեսնում Հայաստանի առաջնությունում հարձակվողներ, ովքեր այժմ պատրաստ են ազգային հավաքականին օգնել։ Եթե լիներ այդպիսի մեկը, մենք խաղը կսկսեինք ոչ թե կեղծ իննով, այլ իրական հարձակվողով»։

Ուշադրության կորուստի մասին.
«Երկրորդ գոլից հետո կորցրինք կենտրոնացումը։ Կրկնում եմ՝ եթե մշտապես բարձր մակարդակով ես խաղում, կարող ես կենտրոնացումը պահել ողջ խաղի ընթացքում, ինչպես արեց Կոսովոն։ Իսկ մենք խաղում էինք դատարկ բենզինի բաքով։ Այդ պատճառով էլ հաշիվը այդպիսին եղավ»։

Ֆիզպատրաստվածության խնդրի լուծման ուղիները.
«Հույս ունեմ, այս ամառ ավելի շատ հայ ֆուտբոլիստներ խաղաժամանակ կստանան, մի մասն էլ կտեղափոխվի ավելի ուժեղ առաջնություններ։ Մենք աշխատում ենք այն ֆուտբոլիստների հետ, ովքեր ունենք։ Ցանկը մեծ չէ, և մեր ապագան կախված է այդ ֆուտբոլիստների խաղային վիճակի բարելավումից»։

Դարպասապահ Հենրի Ավագյանի մասին.
«Հենրին շատ լավ հանդիպում անցկացրեց։ Մի քանի կարևոր սեյվ արեց, նաև լավ էր գործում հարձակման կառուցման ժամանակ։ Իհարկե, երբ 5 գոլ ես բաց թողնում, դժվար է ասել, որ դարպասապահը լավ է խաղացել, բայց Հենրին մի քանի շատ վտանգավոր հարվածներ դադարեցրեց»։

Տիգրան Ավանեսյանի մասին.
«Առաջին 60 րոպեն Տիգրանը լավ խաղաց, կատարում էր իր գործը։ Երբ իր կողքին էին Սպերցյանն ու Հարությունյանը, նա հաջողությամբ էր կատարում իր դերը։ Բայց երբ Հակոբի փոխարեն դուրս եկավ Մանվելյանը և բարձր խաղաց, Ավանեսյանի գործառույթներն ավելացան, և նա սկսեց դիրք կորցնել։ Դժվար էր նրան վերադառնալ խաղի ռիթմին, ինչպես և ամբողջ թիմին»։

Ո՞վ է ավելի մեղավոր՝ մարզի՞չը, թե՞ ֆուտբոլիստները.
«Առաջին խաղակեսից հետո ավելի շատ զայրացած էի մրցավարի վրա։ Նա խաղադադար չտվեց այն դրվագում, երբ Սևիկյանը դուրս եկավ դարպասապահի դեմ և վերջինս խախտեց կանոնները։ Բայց սուլիչ չեղավ։ Խաղից հետո պարզապես հիասթափված էի։ Այսպիսի պարտությունից հետո դա նորմալ է»։

Հինգ թե չորս պաշտպաններով խաղալու սխեմայի մասին.
«Վրաստանի դեմ խաղում հինգ պաշտպանով էինք խաղում, բայց դա նույնպես մեզ չօգնեց։ Եթե նկատեցիք, այսօր Տիգրան Ավանեսյանը իջնում էր ներքև և գրավում կենտրոնական պաշտպանի դիրքը։ Բայց երկրորդ խաղակեսում, երբ տեմպն աճեց, Ավանեսյանը չհասցրեց կատարել այդ տեղաշարժերը, ու մեր պաշտպանությունում բացեր առաջացան»։

Մամուլի ասուլիսի տեսանյութը։

Հայաստանի հավաքականի կազմը այս խաղում.
Հենրի Ավագյան — Հովհաննես Համբարձումյան (Կամո Հովհաննիսյան, 63), Սերգեյ Մուրադյան, Գևորգ Հարությունյան, Նաիր Տիկնիզյան (Էդգար Գրիգորյան, 69) — Տիգրան Ավանեսյան, Հովհաննես Հարությունյան (Գոռ Մանվելյան, 46), Էդուարդ Սպերցյան (Կ) — Էդգար Սևիկյան (Արթուր Միրանյան, 63), Ժիրայր Շաղոյան (Թոմաս Ադորյան, 46), Արթուր Սերոբյան (Նարեկ Գրիգորյան, 82):