Տիգրան Բարսեղյանը ավարտել է կարիերան Հայաստանի ազգային հավաքականում

Հայաստանի ազգային հավաքականի ֆուտբոլիստ Տիգրան Բարսեղյանը հայտարարել է երկրի գլխավոր թիմի կազմում իր կարիերան ավարտելու մասին։ Այս մասին 32-ամյա կիսապաշտպանը հայտնել է իր պաշտոնական հայտարարության մեջ։

«Սիրելի երկրպագուներ, ցանկանում եմ տեղեկացնել, որ որոշում եմ կայացրել ավարտել իմ կարիերան Հայաստանի ազգային հավաքականում։ Ինձ համար մեծ պատիվ և պատասխանատվություն էր երկար տարիներ կրել Հայաստանի հավաքականի մարզաշապիկը և պաշտպանել մեր երկրի գույները։

Ցանկանում եմ շնորհակալություն հայտնել բոլոր մարզիչներին, որոնց հետ ինձ բախտ է վիճակվել աշխատել ազգային թիմում, իմ թիմակիցներին, հավաքականի բժշկական և վարչական շտաբին, Հայաստանի ֆուտբոլի ֆեդերացիայի բոլոր աշխատակիցներին և, իհարկե, մեր հավատարիմ երկրպագուներին, ովքեր միշտ եղել են մեր կողքին՝ թե՛ հաղթանակների պահերին, թե՛ պարտությունների ժամանակ։

Ես կշարունակեմ աջակցել հավաքականին արդեն նոր կարգավիճակով՝ որպես երկրպագու։ Մաղթում եմ մեր ազգային թիմին հաղթանակներ և մեծ նվաճումներ։

Ձերն՝ Տիգրան Բարսեղյան», — նշված է ֆուտբոլիստի հայտարարության մեջ։

Բարսեղյանը Հայաստանի հավաքականի կազմում հանդես է եկել 2016-ից 2025 թվականներին։ Այդ ընթացքում նա անցկացրել է 64 հանդիպում, խփել 9 գոլ և կատարել 14 գոլային փոխանցում՝ դառնալով վերջին տարիների ազգային թիմի ամենակայուն խաղացողներից մեկը։

Իր վերջին հանդիպումը հավաքականի կազմում նա անցկացրել է 2025 թվականի հոկտեմբերի 14-ին Իռլանդիայի դեմ խաղում (0:1)։ Այդ հանդիպման ընթացքում կիսապաշտպանը ստացել է կարմիր քարտ։

Հատկանշական է, որ հավաքականի կազմում անցկացրած վերջին չորս հանդիպումներում Բարսեղյանը խաղադաշտ է դուրս եկել ավագի թևկապով։

Ավելի վաղ Հայաստանի ազգային հավաքականում իրենց կարիերան ավարտել էին Վարազդատ Հարոյանը և Լուկաս Սելարայանը։