Հայ ֆուտբոլիստների խոսքը Կիպրոսի (Մ21) դեմ հանդիպումից առաջ

Հունիսի 3-ին Երևանում՝ ՀՖՖ տեխնիկական կենտրոնում, Հայաստանի Մ21 հավաքականը բարեկամական հանդիպում կանցկացնի Կիպրոսի հասակակիցների դեմ։ Խաղից առաջ Հայաստանի Ֆուտբոլի ֆեդերացիայի մամուլի ծառայությունը զրուցել է թիմի երկու ֆուտբոլիստների հետ՝ երկրպագուներին լավ ծանոթ ԲԿՄԱ-ից Միսակ Ակոպյանի և Գերմանիայի «Հաննովեր»-ում հանդես եկող նորեկ Մարկ Գևորգյանի հետ։

Միսակ Ակոպյան (ԲԿՄԱ).
«Ամեն ինչ շատ ավելի հեշտ է, երբ ակումբում և հավաքականում մարզիչը նույն մարդն է։ Մենք լավ հասկանում ենք, թե նա ինչ է ուզում մեզանից, և փորձում ենք կատարել ամեն ինչ։ Հավաքականում հիմա շատ նորեկներ կան՝ տարբեր երկրներից, բայց մենք շատ լավ հարաբերություններ ունենք։ Թեպետ նոր ենք ծանոթացել, արդեն զգում ենք, որ թիմ ենք դարձել։ Ես, օրինակ, կարող եմ Մարկի և նրա եղբոր՝ Մայքի հետ խոսել գերմաներեն։ Փորձում ենք օգնել մեր բոլոր լեգեոներներին, որպեսզի հեշտությամբ ադապտացվեն ու ամեն ինչ հասկանան։ Մեր հաղթելու շանսերը լավ են՝ լրջորեն պատրաստվում ենք խաղին ու կենտրոնացած ենք միայն արդյունքի վրա»։

Մարկ Գևորգյան («Հաննովեր»).
«Ինձ ֆուտբոլ է բերել հայրս։ Դա նրա համար կարևոր էր, իսկ ինձ էլ սկսեց դուր գալ։ Երբ հրավիրվեցի Հայաստանի երիտասարդական հավաքական, նախ զանգահարեցին հորս։ Նա հարցրեց ինձ՝ “Դու իսկապե՞ս ուզում ես խաղալ Հայաստանի երիտասարդական հավաքականում”։ Ես առանց երկմտելու պատասխանեցի՝ այո։ Դա ինձ համար մեծ ուրախություն է։ Ինձ զգում եմ Հայաստանի հավաքականի մի մասը։ Թիմում հաղորդակցման խնդիրներ չկան՝ ոմանք խոսում են հայերեն, ոմանք՝ ռուսերեն, ոմանք՝ անգլերեն, և մենք բոլորս իրար հետ լեզու ենք գտնում»։