«Սիեթլ Սաունդերս»-ը պարգևատրել է հայ դիրիժոր Տիգրան Առաքելյանին

Հունիսի 28-ին «Օսթինի» հետ տնային հանդիպման ընթացքում MLS-ի «Սիեթլ Սաունդերս» ակումբը Տիգրան Առաքելյանին պարգևատրել է Community Assist Award մրցանակով՝ երաժշտական կրթությանը և հասարակական ակտիվ գործունեությանը նպաստելու համար։ Հայ-ամերիկացի երաժիշտը ճանաչվել է խաղի Հերոս և առանձնացված է եղել մարզադաշտում և ակումբի սոցիալական ցանցերում։

Առաքելյանը ակտիվ աշխատում է երիտասարդության հետ՝ իրականացնելով երաժշտական ծրագրեր և դասական երաժշտությունը հասանելի դարձնելով բոլորին։ Նա ելույթ է ունենում ոչ միայն համերգասրահներում, այլև անսովոր վայրերում՝ բարերում, սրճարաններում, անտունների կացարաններում։ Նրա նպատակն է՝ ոգեշնչել նոր սերնդին և երաժշտությունը դարձնել առօրյայի մի մաս։

Տիգրանը երաժշտական ղեկավարն է Northwest Mahler Festival-ի և Port Townsend Symphony-ի։ Նախկինում աշխատել է Կալիֆոռնիայի և Լոս Անջելեսի նվագախմբերում, ինչպես նաև ղեկավարել է հայտնի համերգասրահներում՝ Walt Disney Concert Hall և Benaroya Hall։

«Սիեթլ Սաունդերս»-ը տարիներ շարունակ աջակցում է համայնքային առաջնորդներին։ Տիգրանին տրված այս մրցանակը ևս մեկ վկայություն է այդ նախաձեռնության։

Տիգրանը ծնվել է Երևանում, սովորել է հետխորհրդային դասական երաժշտական դպրոցում, մանկուց զբաղվել է ֆլեյտայով ու դասական երաժշտությամբ։ 11 տարեկանում ընտանիքի հետ տեղափոխվել է ԱՄՆ։

2016 թվականին Վաշինգտոնի համալսարանում պաշտպանել է դոկտորական ատենախոսություն՝ «Armenian Orchestral Music» թեմայով՝ նվիրված հայկական կոմպոզիտորների երկերի պատմությանը և դասակարգմանը, որոնք միավորում են սփյուռքն ու հայրենիքը։

Ավելին՝ www.TigranArakelyan.com