Սերգեյ Յուրանը չի համարվում Հայաստանի ազգային հավաքականի գլխավոր մարզիչի թեկնածու

Ռուսական լրատվամիջոցներում հայտնվել էր տեղեկություն, որ 55-ամյա ռուս մասնագետ Սերգեյ Յուրանը դիտարկվում է որպես Հայաստանի ազգային հավաքականի գլխավոր մարզիչի թեկնածու։

Սակայն Հայաստանից ֆուտբոլային ինսայդեր Սուրեն Մելիքսեթյանը հերքել է այս տեղեկությունը՝ նշելով, որ Հայաստանի ֆուտբոլի ֆեդերացիան դիտարկում է այլ տարբերակներ։

Ինքը՝ Սերգեյ Յուրանը, «RB Sport»-ին տված հարցազրույցում մեկնաբանել է իր հնարավոր աշխատանքի մասին լուրերը ազգային թիմի հետ.

«Ինձ համար հետաքրքիր կլինի ղեկավարել Հայաստանի ազգային հավաքականը։ Պատրաստ եմ քննարկել նման առաջարկ, առավել եւս, որ արդեն աշխատել եմ այդ երկրում։ Երևանը շատ եմ հավանել, գիտեմ՝ ինչպես է զարգանում սպորտը։ Կարծում եմ, որ Հայաստանի հավաքականում կան ուժեղ ֆուտբոլիստներ, որոնց հետ հնարավոր է պայքարել աշխարհի առաջնության ուղեգրի համար։

Բացի այդ, Հայաստանի հավաքականում շատ ֆուտբոլիստներ կան, ովքեր հանդես են գալիս Ռուսաստանի առաջնությունում, եւ ես նրանց լավ ճանաչում եմ։ Ընդհանուր առմամբ, կրկնեմ՝ ինձ համար հետաքրքիր կլինի, բայց առայժմ ինձ ոչ ոք չի զանգահարել», – նշել է Յուրանը։