Սեմյոն Դանիելյանցը արդեն Բոստոնում է, որտեղ մեկնարկում է գեղասահքի աշխարհի առաջնությունը

Հայ գեղասահորդ Սեմյոն Դանիելյանցը մեկնել է Բոստոն, որտեղ վաղը հանդես կգա 2025 թվականի գեղասահքի աշխարհի առաջնությունում։ Նա կլինի Հայաստանի միակ ներկայացուցիչը այս մրցաշարում։

18-ամյա մարզիկի համար սա արդեն երկրորդ աշխարհի առաջնությունն է։ Անցած տարի նա զբաղեցրել է 22-րդ տեղը, իսկ վերջերս կայացած Եվրոպայի առաջնությունում ավարտել է 17-րդ հորիզոնականում։

Բոստոն Դանիելյանցը ժամանել է Հայաստանի գեղասահքի ֆեդերացիայի ներկայացուցիչների՝ Արամ Վլասյանի, Արի Զաքարյանի, Գարիկ Ազատյանի, ինչպես նաև իր անձնական մարզիչ Մարտին Դեգենայսի հետ։

Բոստոն ժամանելուց հետո հայկական պատվիրակությանը հանդիպել է գեղասահքի հայտնի մարզիչ Ռաֆայել Հարությունյանը, որը գործունեություն է ծավալում ԱՄՆ-ում։ Նա 2024 թվականի աշխարհի չեմպիոն, ամերիկացի Իլյա Մալինինի մարզիչն է, ով նույնպես հանդես կգա Բոստոնում։

Ռաֆայել Հարությունյանը մարզել է բազմաթիվ աշխարհի չեմպիոնների, այդ թվում՝ կրկնակի օլիմպիական չեմպիոն Նաթան Չենին։