Հայաստանի Մ-17 հավաքականը մեկնարկում է Եվրոպայի առաջնության ընտրական փուլի 11-րդ խմբում

Հոկտեմբերի 28-ից Կիպրոսում կմեկնարկեն մինչև 17 տարեկանների Եվրոպայի առաջնության ընտրական փուլի 11-րդ խմբի հանդիպումները։ Խմբում Կիպրոսի հավաքականի հետ միասին հանդես կգան Հայաստանի, Ֆինլանդիայի և Հյուսիսային Իռլանդիայի թիմերը։

Խումբը խոստանում է լինել հավասար և պայքարային, քանի որ բոլոր չորս հավաքականներն էլ ունեն իրական հնարավորություններ դուրս գալու հաջորդ փուլ։

Խմբային փուլի արդյունքներով առաջին երկու թիմերը կանցնեն երկրորդ փուլ՝ A լիգա (Եվրոպայի 28 լավագույն հավաքականներ), որտեղ կորոշվի եզրափակչական փուլի ուղեգիրը՝ Էստոնիայում անցկացվելիք մրցաշարի համար։
Խմբի երրորդ և չորրորդ թիմերը կմասնակցեն B լիգայի երկրորդ փուլին՝ պայքարելով A լիգա բարձրանալու համար։

Հայաստանի Մ-17 հավաքականի առաջին մրցակիցը կլինի Հյուսիսային Իռլանդիան։ Հանդիպումը կկայանա երեքշաբթի՝ հոկտեմբերի 28-ին։ Այնուհետև մեր թիմը կհանդիպի Ֆինլանդիայի (հոկտեմբերի 31) և Կիպրոսի (նոյեմբերի 3) հավաքականների հետ։

Կիպրոսի հավաքականի հանդիպումները կցուցադրվեն Alpha Cyprus հեռուստաալիքով ուղիղ եթերով։

Հայաստանի Մ-17 հավաքականի խաղերի օրացույցը Կիպրոսում.

• Հոկտեմբերի 28՝ Հյուսիսային Իռլանդիա Մ-17 – Հայաստան Մ-17

• Հոկտեմբերի 31՝ Ֆինլանդիա Մ-17 – Հայաստան Մ-17

• Նոյեմբերի 3՝ Հայաստան Մ-17 – Կիպրոս Մ-17