Հայաստանի լակրոսի հավաքականը Պորտուգալիայի մրցաշարում սկսեց երկու հաղթանակով

Այսօր՝ մարտի 7-ին, Պորտուգալիայում մեկնարկեց օլիմպիական լակրոսի MEN’S EUROLAX SIXES CUP 2025 մրցաշարը։ Մրցումներին մասնակցում են վեց հավաքականներ՝ Հայաստան, Նիդեռլանդներ, Պորտուգալիա, Շվեյցարիա, Լյուքսեմբուրգ և Ֆրանսիա։

Լակրոսը թիմային մարզաձև է, որտեղ խաղացողները փորձում են գնդակը տեղավորել մրցակցի դարպասում՝ օգտագործելով հատուկ ձեռնափայտեր։ Խաղն իր ծագումն ունի Հյուսիսային Ամերիկայի բնիկ ժողովուրդների շրջանում և ժամանակի ընթացքում լայն տարածում է գտել ամբողջ աշխարհում։

Լակրոսը կներկայացվի 2028 թվականի Լոս Անջելեսի Օլիմպիական խաղերում։ Դրա համար հատուկ մշակվել է նոր ձևաչափ՝ Lacrosse Sixes, որտեղ խաղադաշտում հանդես են գալիս յուրաքանչյուր թիմից վեցական խաղացող։ Պորտուգալիայի մրցաշարը դարձավ այս ձևաչափով առաջին մրցումը, որը միաժամանակ հանդիսանում է օլիմպիական որակավորման ցիկլի մեկնարկային փուլը։

Հայաստանի հավաքականը կազմված է ԱՄՆ-ում հանդես եկող խաղացողներից։ 

Սկզբնական խաղերում Հայաստանի հավաքականը տարավ երկու հաղթանակ․

Հայաստան - Պորտուգալիա 15:11

Հայաստան - Շվեյցարիա 15:13

Հայաստանի լակրոսի ֆեդերացիայի նախագահ Ջոն Մուրադյանը նշեց Պորտուգալիայի մրցաշարի կարևորությունը․

«Eurolax SIXES մրցաշարը Պորտուգալիայում կլինի մեր երկրորդ միջազգային մրցաշարը SIXES ձևաչափով, և մենք ուրախ ենք նոր ութ խաղացողի միանալուն։ Որքան շատ խաղացողներ փորձ ձեռք բերեն այս ձևաչափում, այնքան լավ պատրաստ կլինենք 2026 թվականին մեկնարկող SIXES-ի որակավորման մրցաշարերին։ Լակրոսի ներառումը 2028 թվականի Օլիմպիական խաղերի ծրագրում մեզ հնարավորություն է տալիս կառուցել ուժեղ թիմ ապագա մրցումների համար»։

Հիշեցնենք, որ ավելի վաղ Հայաստանի հավաքականը մասնակցել էր Հունաստանում կայացած Երկրորդ ամենամյա Բալկանյան լակրոսի փառատոնին, որտեղ եզրափակչում 19:21 հաշվով պարտվեց Նիդեռլանդներին։ Այժմ թիմը շարունակում է պատրաստվել Eurolax SIXES CUP 2025 մրցաշարի հաջորդ հանդիպումներին՝ նպատակ ունենալով դուրս գալ փլեյ-օֆֆ և պայքարել մեդալների համար։