Հայաստանի հունահռոմեական ըմբշամարտի հավաքականը ամփոփել է Մ23 Եվրոպայի առաջնության արդյունքները մամուլի ասուլիսում

Հայաստանի հունահռոմեական ըմբշամարտի հավաքականը Մ23 Եվրոպայի առաջնությունից վերադառնալուց հետո մամուլի ասուլիս է անցկացրել «Արմենպրես» մամուլի կենտրոնում։ Լրագրողների հետ հանդիպել են թիմի գլխավոր մարզիչ Արմեն Բաբալարյանը, ինչպես նաև մրցաշարի մրցանակակիրները՝ Եվրոպայի չեմպիոններ Սուրեն Աղաջանյանը (60 կգ) և Արամայիս Հարությունյանը (130 կգ), արծաթե մեդալակիր Սամվել Տերտերյանը (77 կգ) և բրոնզե մեդալակիր Մանվել Խաչատրյանը (55 կգ)։

Մրցաշարի արդյունքում Հայաստանի հավաքականը նվաճել է չորս մեդալ՝ երկու ոսկե, մեկ արծաթե և մեկ բրոնզե, և զբաղեցրել է երկրորդ տեղը թիմային հաշվարկում։

Արմեն Բաբալարյան․ «Մենք ավելիին էինք սպասում»

Թիմի գլխավոր մարզիչ Արմեն Բաբալարյանը, ամփոփելով ելույթը, նշել է․

«Մեր արդյունքը՝ երկու ոսկի, մեկ արծաթ և մեկ բրոնզ է։ Սամվել Տերտերյանի արծաթե մեդալը ինձ համար հավասար է ոսկու, քանի որ նա երկու տարով փոքր էր իր մրցակիցներից։ Նա հաղթել է գործող Մ23 աշխարհի չեմպիոնին և մեծահասակների Եվրոպայի առաջնության բրոնզե մեդալակիրին, իսկ եզրափակչում պարտվել է միայն 1։1 հաշվով։

Մանվել Խաչատրյանից ավելի մեծ սպասելիքներ կային, քանի որ նա արդեն հանդես էր եկել մեծահասակների մակարդակում, սակայն Ռուսաստանի ներկայացուցչի հետ գոտեմարտը չստացվեց։ Ինչ վերաբերում է Արամայիս Հարությունյանին, սա նրա առաջին մեդալն է նման մակարդակում։

130 կգ քաշային կարգում մեզ մոտ մեծ մրցակցություն կա՝ միանգամից երեք ուժեղ մարզիկ։ Նրանք օգնում են միմյանց առաջադիմել։ Անցյալ տարի Ռազմիկ Քուրդյանը դարձավ աշխարհի առաջնության արծաթե մեդալակիր, իսկ Ալբերտ Վարդանյանը՝ բրոնզե։ Նախկինում համարվում էր, որ ծանր քաշերը մեր ուժեղ կողմը չեն, սակայն մեր ըմբիշները իրենց աշխատանքով կոտրում են այդ կարծրատիպերը։

Մենք նաև սպասում էինք ևս մեկ-երկու մեդալի։ Աշոտ Խաչատրյանը և Վիգեն Նազարյանը հավակնում էին մրցանակային տեղերի, սակայն չկարողացան իրացնել իրենց հնարավորությունները։ Ռուբեն Գևորգյանը վերջերս 87 կգ քաշային կարգից անցել է 97 կգ, և նրա համար սա նոր փուլ է։ Արմեն Սուքիասյանն էլ դեռ ամբողջությամբ չի հարմարվել 63 կգ քաշին։

Մեծահասակների Եվրոպայի առաջնությանը կմասնակցեն մեր շատ երիտասարդ մարզիկներ։ Մրցաշարից առաջ մենք կանցկացնենք ևս երկու ուսումնամարզական հավաք ամբողջ թիմով»։

Սուրեն Աղաջանյան․ «Գոհ եմ արդյունքից»

Մ23 Եվրոպայի չեմպիոն Սուրեն Աղաջանյանը (60 կգ) նշել է․

«Ես անցկացրել եմ հիանալի մրցաշար և գոհ եմ արդյունքից։ Ընդհանուր առմամբ թիմը լավ հանդես եկավ։ Կային սխալներ, որոնց վրա պետք է աշխատել, որպեսզի դրանք չկրկնվեն մեծահասակների մրցումներում։ Արդեն պատրաստվում եմ մեծահասակների Եվրոպայի առաջնությանը։

Հատկապես հիշվեց լեհ ըմբիշի հետ գոտեմարտը․ մի պահ կորցրեցի կենտրոնացումը, սակայն կարողացա հավաքվել և հաղթել»։

Արամայիս Հարությունյան․ «Շատ էի սպասում այս հաղթանակին»

Մ23 Եվրոպայի մեկ այլ չեմպիոն Արամայիս Հարությունյանը (130 կգ) նշել է․

«Եզրափակիչը ինձ համար առանձնահատուկ էր։ Իմ մրցակիցը Հունգարիայից երեքակի Եվրոպայի չեմպիոն և կրկնակի աշխարհի չեմպիոն էր։ Մրցաշարը ընդհանուր առմամբ լարված էր։ Այս հաղթանակը երկար սպասված էր։ Մեդալը ինձ վստահություն կտա, բայց չեմ պատրաստվում կանգ առնել ձեռք բերվածի վրա»։

Սամվել Տերտերյան․ «Բոլոր գոտեմարտերը բարդ էին»

Արծաթե մեդալակիր Սամվել Տերտերյանը (77 կգ) նշել է․

«Եզրափակչից առաջ անցկացրել եմ երեք գոտեմարտ և բոլորը հաղթել եմ նույն հաշվով։ Մրցակիցները շատ ուժեղ էին, յուրաքանչյուր գոտեմարտ դժվար էր։ Մենք դեռ մանրամասն վերլուծություն չենք արել, սակայն առջևում մարզումներ են, որոնց ընթացքում կվերլուծենք սխալները և կփորձենք շտկել դրանք»։

Մանվել Խաչատրյան․ «Կձգտեմ ավելիին»

Բրոնզե մեդալակիր Մանվել Խաչատրյանը (55 կգ) նշել է․

«Ես Եվրոպայի առաջնությանը մեկնել էի ոսկի նվաճելու նպատակով, սակայն արդյունքում դարձա բրոնզե մեդալակիր։ Կաշխատեմ, որպեսզի հաջորդ մրցաշարերում բարելավեմ արդյունքս։ Հատկապես հիշվեց Թուրքիայի ներկայացուցչի հետ գոտեմարտը․ նման մենամարտերը պահանջում են հատուկ պատրաստվածություն և սառնասրտություն։ Ուրախ եմ, որ կարողացա հաղթահարել էմոցիաները և հաղթել»։