Սաուդյան ֆոնդը գնել է Electronic Arts-ը ռեկորդային գումարով

Խաղային արդյունաբերությունը ցնցված է խոշոր իրադարձությամբ․ Սաուդյան Արաբիայի Պետական ներդրումային ֆոնդի (PIF) գլխավորությամբ ներդրողների կոնսորցիումը՝ Silver Lake-ի և Affinity Partners-ի մասնակցությամբ, հայտարարեց Electronic Arts-ի գնման մասին։ Գործարքը գնահատվում է մոտ 55 միլիարդ դոլար, ինչը դարձնում է այն պատմության մեջ երկրորդ ամենամեծը խաղային ոլորտում՝ զիջելով միայն Microsoft-ի Activision Blizzard-ի գնումին՝ 67,8 միլիարդ դոլարով։

Նույն ֆոնդը նաև տիրապետում է Անգլիայի «Նյուքասլ» ֆուտբոլային ակումբին։

Արդյունքում EA-ն՝ EA Sports FC (նախկին FIFA), Battlefield և Madden NFL հայտնի շարքերով հրատարակիչը, դադարելու է լինել հանրային ընկերություն․ դրա բաժնետոմսերը այլևս չեն վաճառվի բորսայում։ Ըստ պայմանագրի՝ բաժնետերերը յուրաքանչյուր բաժնետոմսի դիմաց կստանան 210 դոլար կանխիկ։ Գլխամասային գրասենյակը կմնա Կալիֆոռնիայի Ռեդվուդ Սիթիում, իսկ գլխավոր տնօրեն Էնդրյու Վիլսոնը կպահպանի իր պաշտոնը։

Գործարքը արդեն հաստատվել է բոլոր կողմերի կողմից և նախատեսվում է ավարտին հասցնել 2027 թ․ ֆինանսական տարվա առաջին եռամսյակում։ Սակայն փորձագետները չեն բացառում հակամենաշնորհային մարմինների հնարավոր ստուգումները, ինչպես դա եղավ Activision Blizzard-ի դեպքում։

Ավելի վաղ PIF-ը ուներ EA-ի բաժնետոմսերի մոտ 10%-ը, սակայն այժմ ֆոնդը ամբողջությամբ կհամախմբի ակտիվը իր գործընկերների հետ։ Սա խաղային ոլորտում պատմության մեջ ամենամեծ մասնավոր կանխիկ ներդրումն է։

Էնդրյու Վիլսոնը նշեց, որ միավորումը նոր հեռանկարներ կբացի․

«Մեր տաղանդավոր թիմերը աշխարհին պարգևել են ամենահայտնի խաղային շարքերից մի քանիսը՝ ոգեշնչելով հարյուր միլիոնավոր խաղացողներին։ Այժմ սկսվում է նոր գլուխ։ Գործընկերների հետ միասին մենք կձևավորենք զվարճանքի, սպորտի և տեխնոլոգիաների ապագան՝ ստեղծելով եզակի փորձառություններ հաջորդ սերունդների համար»։