Սարգիս Բեգոյանը՝ ազատ ոճի ըմբշամարտի Եվրոպայի մինչև 20 տարեկանների չեմպիոն

Հայ ըմբիշ Սարգիս Բեգոյանը առաջին անգամ իր կարիերայում նվաճեց Եվրոպայի պատանեկան առաջնության ոսկե մեդալ: Մինչ այդ նա մասնակցել էր միայն մինչև 15 տարեկանների մրցաշարին, որտեղ 2021 թվականին դարձել էր բրոնզե մեդալակիր։ 2025 թվականին 19-ամյա Բեգոյանը նորամուտ ունեցավ մինչև 20 տարեկանների Եվրոպայի առաջնությունում և անմիջապես դարձավ չեմպիոն՝ 61 կգ քաշային կարգում։

Եզրափակիչում հայ ըմբիշը հաղթեց մրցաշարի գլխավոր ֆավորիտին՝ ռուս Ադլան Սայտիևին՝ 6:5 հաշվով։ Բեգոյանը ցուցադրեց հասուն և տակտիկապես գրագետ ըմբշամարտ՝ վստահորեն վերահսկելով յուրաքանչյուր գոտեմարտ իր ոսկու ճանապարհին։

Սարգիս Բեգոյանի ոսկու ուղին (Կաորլե, Իտալիա)
1/8 եզրափակիչ — Սարգիս Բեգոյան (Հայաստան) – Անդրեյ Շկոլյուկ (Ուկրաինա) — 4:2
1/4 եզրափակիչ — Սարգիս Բեգոյան (Հայաստան) – Էլիա Աարոն Լուցիգա (Գերմանիա) — 11:0
1/2 եզրափակիչ — Սարգիս Բեգոյան (Հայաստան) – Սանդրո Հունգերբյուխլեր (Շվեյցարիա) — 7:0
Եզրափակիչ — Սարգիս Բեգոյան (Հայաստան) – Ադլան Սայտիև (Ռուսաստան) — 6:5

Եզրափակչի տեսագրությունը կհրապարակվի մեր թելեգրամյան ալիքում։

Բեգոյանի ոսկե մեդալից բացի՝ ազատ ոճի ըմբշամարտի Հայաստանի երիտասարդական հավաքականը Եվրոպայի մինչև 20 տարեկանների առաջնությունում նվաճեց նաև մեկ բրոնզե մեդալ։

86 կգ քաշային կարգում երրորդ տեղը գրավեց Ռազմիկ Եփրեմյանը։ Բրոնզե մեդալի համար գոտեմարտում նա վստահ հաղթանակ տարավ Ադրբեջանի ներկայացուցիչ Մուհամմադ Աբասզադեի նկատմամբ՝ 3:0 հաշվով։