Սանդրո Պերկովիչ․ «Ամեն ինչ կլուծվի պատասխան խաղում։ Մեզ պետք է 12-րդ խաղացողը»
- Հեղինակ: Vahe Hakobyan
- Sportaran
«Նոա»-ի գլխավոր մարզիչ Սանդրո Պերկովիչը ամփոփեց Գիբրալթարում կայացած՝ Եվրոպայի լիգայի որակավորման երրորդ փուլի «Լինքոլնի» հետ արտագնա խաղը, որն ավարտվեց 1։1 հաշվով։ Պատասխան հանդիպումը տեղի կունենա օգոստոսի 14-ին՝ Աբովյանում։
– Սա բարդ ու մրցակցային խաղ էր, և մենք հենց այդպիսի խաղ էլ էինք ակնկալում, – ասաց Պերկովիչը հանդիպումից հետո։ – Արհեստական խոտածածկը և բարձր խոնավությունն իրավիճակն ավելի բարդացրին։ Այնուամենայնիվ, լավ մեկնարկեցինք․ գոլ խփեցինք, որը, ցավոք, չհաշվվեց, հետո էլ նորից առաջ անցանք։ Խաղի առաջին 20 րոպեն լիովին վերահսկում էինք։
Ըստ մարզչի՝ հաջող մեկնարկից հետո թիմը մի փոքր զիջեց դիրքերը, ինչից օգտվեց մրցակիցը․
– Ինձ թվաց՝ ֆուտբոլիստները բավարարվեցին արդյունքով ու կորցրին խաղի վերահսկումը։ Շատ հաճախ էինք գնդակը փոխանցում դարպասապահին, և հենց նման մի դրվագում էլ նշանակվեց 11 մետրանոց։
Երկրորդ կեսում, ինչպես նշեց Պերկովիչը, խաղն ավելի քաոսային դարձավ․
– Սա անհավասարակշիռ ֆուտբոլ էր։ Կառուցվածք չկար, ռիթմը մշտապես խաթարվում էր՝ շատ խախտումներ, դեղին քարտեր․․․ Մրցավարի աշխատանքը չեմ մեկնաբանի։ Արհեստական դաշտերում նման բան հաճախ է լինում։
Պերկովիչը շեշտեց՝ ամեն ինչ որոշվելու է Հայաստանում կայանալիք պատասխան խաղում՝ միաժամանակ դիմելով երկրպագուներին․
– Ամեն ինչ կլուծվի պատասխան խաղում՝ մեր մարզադաշտում։ Կոչ եմ անում բոլոր երկրպագուներին՝ եկեք ու աջակցեք մեզ։ Մեզ իսկապես պետք է 12-րդ խաղացողը։
Նա նաև գովեստով խոսեց մրցակցի մասին․
– Չեմ կարծում, որ հոգնածությունն էր խնդիրը։ Մենք լավ էինք խաղում։ Պարզապես պետք է գնահատել մրցակցին․ նրանք փորձառու ֆուտբոլիստներ ունեն, ովքեր լավ գիտեն՝ ինչ անել։ Նման դաշտում բոլորի համար էլ դժվար է, և նրանք կարողացան ճիշտ օգտվել դրանից։
Քննարկեք նորությունները!
Անցնել մեկնաբանություններին ↓
Comments
0