Սանդրո Պերկովիչ․ «Մեզ համար հանդիպումը կսկսվի 0։0 հաշվից, մենք ուզում ենք կրկին հաղթել»

«Նոա»-ի գլխավոր մարզիչ Սանդրո Պերկովիչը կիսվեց իր սպասումներով՝ Կոնֆերենցիաների լիգայի փլեյ-օֆֆի պատասխան խաղից առաջ, որը կանցկացվի սլովենական «Օլիմպիայի» (Լյուբլյանա) դեմ։ Առաջին խաղում հայկական թիմը տպավորիչ արտագնա հաղթանակ տարավ՝ 4։1 հաշվով, և մոտեցավ եվրոգավաթների խմբային փուլին։ Պատասխան հանդիպումը տեղի կունենա օգոստոսի 28-ին Աբովյանում։

Մրցակցի և թիմի տրամադրվածության մասին
«Մենք լավ վերլուծեցինք առաջին հանդիպումը՝ հասկանալու համար, թե ինչ կարող ենք բարելավել։ Շատ հարգում ենք «Օլիմպիային»․ դա իր երկրի չեմպիոնն է։ Բայց մենք նույնպես հավատում ենք մեր ուժերին և որակներին, վստահ ենք, որ արժանի ենք խաղալու եվրոգավաթների խմբային փուլում և դա կպատմենք խաղադաշտում», — ասել է Պերկովիչը։

Ըստ մարզչի՝ թիմը պատրաստ է արդարացնել երկրպագուների սպասելիքները․
«Դժվար է պատկերացնել, թե մեր երկրպագուները ինչ էլ ավելի որակյալ խաղ են սպասում մեզանից առաջին հանդիպումից հետո, բայց մենք կանենք ամեն ինչ՝ չհիասթափեցնելու նրանց»։

Պաշտպանության ընտրության մասին
Հարցին՝ Մուրադյան – Սիլվա կենտրոնական պաշտպանների զույգի մասին, որոնք անցկացրել են բոլոր եվրախաղերը, Պերկովիչը պատասխանեց․
«Մեզ մոտ անփոխարինելի խաղացողներ չկան։ Եվրոպայի մրցաշարերի հայտում ունենք երեք կենտրոնական պաշտպան՝ ներառյալ Զոլոտիչին, որը արդեն խաղացել է առաջնությունում։ Ես գոհ եմ բոլորից, կտեսնենք՝ ով կսկսի վաղը հիմնական կազմում»։

Անցյալ տարվա փորձի մասին
Լրագրողները հիշեցրին անցած տարվա դեպքը, երբ «Նոա»-ն 3։0 հաշվով հաղթեց «Ռուժոմբերոկին», բայց երկրորդ խաղում հազիվ չկորցրեց առավելությունը։ Պերկովիչը վստահեցրեց, որ թիմը դասեր քաղել է․
«Ես լավ գիտեմ «Նոա»-ի պատմությունը և այդ եվրոպական ուղին։ Բայց դա արդեն անցյալ է։ Վաղվա խաղը մեզ համար կսկսվի 0։0 հաշվից, և մենք ուզում ենք հաղթել։ Կարող եմ երաշխավորել, որ թիմը ցույց կտա իր առավելագույնը՝ երկրպագուներին ուրախացնելու համար»։

Մարզական պատրաստության մասին
«Մենք ունեինք ամբողջ շաբաթը պատրաստվելու համար։ Լավ մարզումներ անցկացրինք, բոլոր հայտավորված խաղացողները պատրաստ են։ Կարծում եմ՝ «Օլիմպիան» իր խաղը շատ չի փոխի, բայց անկասկած ավելի շատ կհարձակվի և ռիսկի կդիմի։ Դա մեզ համար տարածք կստեղծի, որից կփորձենք օգտվել», — ընդգծեց մարզիչը։