Ռոբերտ Արզումանյան․ «Գլխավոր փիլիսոփայությունս՝ հաղթել գեղեցիկ խաղով»

«Ուրարտու» ֆուտբոլային ակումբի գլխավոր մարզիչ Ռոբերտ Արզումանյանը թիմ վերադարձից հետո առաջին հարցազրույցն է տվել։ Ակումբի մամուլի ծառայության հետ զրույցում մասնագետը կիսվել է իր զգացողություններով, պատմել է աշխատանքի փիլիսոփայության մասին, գնահատել է ֆուտբոլիստների ներուժը և նշել առաջնահերթությունները մրցաշրջանի համար։

Ավելի վաղ հաղորդվել էր Արզումանյանի նշանակման մասին։ Սա նրա առաջին փուլը չէ «Ուրարտուում»․ 2021/22 մրցաշրջանում նա արդեն գլխավորել էր թիմը և հիմք դրել հետագա հաջողություններին։ Այժմ նա վերադառնում է ծանոթ մթնոլորտ՝ նոր նպատակներով և թարմ հայացքով։

Ստորև՝ մարզչի ամբողջական հարցազրույցը․

«Շատ ուրախ եմ վերադառնալու համար։ Հիշողություններն ու աշխատանքը, որ միասին կատարել ենք «Ուրարտու» ակումբի, ֆուտբոլիստների, հայ երիտասարդների և արտասահմանցիների հետ, շատ դրական էին։ Մենք կարողացանք ստեղծել մի թիմ, որը խաղում էր լավ և գեղեցիկ ֆուտբոլ։ Թիմը հաղթանակներ էր տանում, և ես ուրախ եմ, որ դրանից հետո ակումբը կարողացավ հասնել ավելի մեծ և երկարատև հաջողությունների։

Ես վերադարձել եմ դրական զգացողություններով, ինձ զգում եմ ինչպես տանը, քանի որ հենց «Ուրարտուում» եմ արել իմ առաջին քայլերը որպես գլխավոր մարզիչ։

Իհարկե, հետևել եմ «Ուրարտուի» խաղերին, ինչպես նաև որոշ հայ ֆուտբոլիստների, որոնք ինձ հետ էին սկսել Բարձրագույն լիգայում։ Շատ ուրախ եմ, որ նրանք հասել են պրոֆեսիոնալ աճի։ Նարեկ Գրիգորյանը խաղում է արտասահմանում, իսկ Իվուն՝ մեր սաներից մեկն է, հանդես է գալիս Հայաստանի հավաքականում։

Բարձր եմ գնահատում Դմիտրի Գունկոյի աշխատանքը այդ ֆուտբոլիստների հետ։ Հիմա տեսնում եմ, որ նրանք մոտիվացված են և պատրաստ։

Մենք պետք է ավելի լավ աշխատենք, բարելավենք խաղային կապերը․ սա շարունակական գործընթաց է։ Սակայն այն, ինչ հիմա ունենք, ինձ լիովին բավարարում է։

Իմ գլխավոր փիլիսոփայությունն է՝ թիմը պետք է հաղթի լավ խաղով։

Բոլոր ֆուտբոլիստները՝ թե հայ, թե արտասահմանցի, հավասար են։ Յուրաքանչյուրը կարող է հայտնվել մեկնարկային կազմում։ Մենք անհատապես կաշխատենք յուրաքանչյուրի հետ՝ իրենց ներուժը բացահայտելու համար։ Այն, ով տվյալ պահին ուժեղ է, հենց նա էլ կխաղա։

«Ուրարտուում» միշտ եղել են և կան տաղանդավոր հայ ֆուտբոլիստներ, որոնք պարտադիր պետք է զարգանան։ Բայց ամեն ինչ պետք է լինի բնական։

Մեր սաները՝ մեր ապագան են։ Մենք պետք է աջակցենք նրանց խելամիտ որոշումներով՝ զարգացնելու համար ֆուտբոլը, ակումբները և հայ ֆուտբոլիստներին։

Միշտ պետք է մտածենք այն փոփոխությունների մասին, որոնք կտան դրական արդյունքներ։

Արաս Օզբիլիսը բարձրակարգ ֆուտբոլիստ էր և լավ էր հասկանում խաղը։ Այժմ, որպես մարզիչ, օգնում է նկատել մանրուքները, տալիս է ճիշտ խորհուրդներ։ Նա մեծ օգուտ կբերի մեզ։

Այո, եվրագավաթներում մեզ սպասում է ուժեղ մրցակից։ Մենք հարգում ենք բոլորին, այդ թվում՝ բելառուսական «Նեման» թիմին, որտեղ որակյալ խաղացողներ կան։

Մենք ունենք հաղթող ֆուտբոլիստներ։ Պետք է ուժեղացնենք մեր խաղը բոլոր ասպեկտներում՝ ինչպես գնդակով, այնպես էլ առանց դրա։

Հայաստանի առաջնությունում կան ուժեղ թիմեր, բայց դրանք կարող են փոխվել ամեն տարի։ Կցանկանայինք, որ առաջատարների և մյուս ակումբների միջև տարբերությունը այդքան մեծ չլիներ։ Թիմերն ու ֆուտբոլիստները զարգանում են մրցակցության միջոցով։ Նույնպես կցանկանայինք, որ երկրում ավելանան ֆուտբոլային դաշտերը՝ ոչ միայն Երևանում։

Նոր մրցաշրջանում պայքարելու ենք ամենաբարձր տեղերի համար։ Երկրորդ, բայց ոչ պակաս կարևոր նպատակը՝ մեր մարզադաշտը լցնել երկրպագուներով»։

Թիմն արդեն ակտիվ պատրաստվում է Կոնֆերենցիայի լիգայի որակավորման առաջին փուլի հանդիպմանը բելառուսական «Նեմանի» հետ։ Խաղը կկայանա հուլիսի 10-ին։

Արզումանյանի վերադարձով «Ուրարտուի» համար սկսվում է նոր փուլ, որտեղ ուշադրությունը կենտրոնացած է թիմային խաղի, երիտասարդների զարգացման և բարձր որակի ու դիտարժան ֆուտբոլի վրա։