Վազգեն Սարգսյանի անվան «Հանրապետական» մարզադաշտը կարող է որակազրկվել ՈւԵՖԱ-ի մրցաշարերում

Մարտի 20-ին Երևանում կայանալիք Հայաստանի և Վրաստանի հավաքականների հանդիպումից առաջ Հայաստանի ֆուտբոլի ֆեդերացիան (ՀՖՖ) կարևոր հայտարարություն է արել՝ կապված երկրի գլխավոր մարզադաշտի կարգավիճակի հետ։

ՀՖՖ-ն նախազգուշացրել է հնարավոր որակազրկման մասին

«Հայաստանում ՈւԵՖԱ-ի բարձրագույն միջազգային չափանիշներին համապատասխանող միակ մարզադաշտը՝ Վազգեն Սարգսյանի անվան «Հանրապետական» մարզադաշտը, ՈւԵՖԱ-ի հատուկ հսկողության տակ է հայտնվել՝ որոշակի երկրպագուների վարքագծի պատճառով, որը դրսևորվել է ՈւԵՖԱ-ի Ազգերի լիգայի Հայաստան – Ֆարերյան կղզիներ հանդիպման ընթացքում։

ՈւԵՖԱ-ի եզրակացության համաձայն, եթե նման միջադեպ կրկնվի, ապա «Հանրապետական» մարզադաշտը որակազրկվելու է, ինչը նշանակում է, որ Հայաստանի ազգային հավաքականն ու հայկական ակումբները չեն կարողանալու խաղալ այնտեղ։ Ավելին, սա լրջորեն կազդի 2029 թվականի մինչև 20 տարեկանների ֆուտբոլի աշխարհի առաջնության (Հայաստան - Վրաստան) անցկացման հնարավորության վրա»։

ՀՖՖ-ն դատապարտել է երկրպագուների այս վարքագիծը՝ այն որակելով որպես հայկական ֆուտբոլին վնաս հասցնելու փորձ։ Հայտարարության մեջ երկրպագուներին կոչ է արվում զերծ մնալ նման գործողություններից և կենտրոնանալ բացառապես ազգային հավաքականի և ակումբների աջակցության վրա։

Հնարավոր որակազրկման պատճառները

Հայաստան – Ֆարերյան կղզիներ հանդիպման ժամանակ որոշ երկրպագուներ իրենց դժգոհությունն են արտահայտել ՀՖՖ-ի գործունեությունից՝ պահանջելով Հայաստանի ֆուտբոլի ֆեդերացիայի նախագահ Արմեն Մելիքբեկյանի հրաժարականը։ Նման ակցիաները շարունակվում են նաև Հայաստանի Պրեմիեր լիգայի հանդիպումների ժամանակ։

Օրինակ՝ փետրվարի 28-ին բողոքի ցույցերի պատճառով հետաձգվեց «Արարատ» – «Գանձասար» հանդիպումը, իսկ մարտի 1-ին «Վան» – «Ալաշկերտ» խաղը դադարեցվեց 30 րոպեով։ Այս միջադեպերը ՈւԵՖԱ-ի հատուկ ուշադրության կենտրոնում են, և կառույցն ուշադիր հետևում է հայկական ֆուտբոլում զարգացող իրադարձություններին։