«Ժամանակը կգա, և դուք կիմանաք ճշմարտությունը» — Մխիթարյան

Հենրիխ Մխիթարյանը Միլանի դերբիից հետո պատասխանել է Azatutyun TV-ի հայ լրագրողի հարցերին։ Հարցազրույցի ընթացքում 36-ամյա ֆուտբոլիստին հարցրել են Հայաստանի ազգային հավաքականի և նրա հնարավոր վերադարձի մասին։

— Ո՞րն է Հայաստանի հավաքականի անհաջողությունների պատճառը։ Ի՞նչ կարելի է փոխել՝ դրական արդյունքի հասնելու համար։

— Արդեն երեք տարի է՝ չեմ խաղում հավաքականում։ Չգիտեմ թիմի ներքին իրավիճակը, տեղյակ չեմ, թե այնտեղ ինչ է կատարվում, այդ պատճառով չեմ կարող նշել պատճառները։ Միակ բանը, որ կարող եմ անել՝ հաջողություն մաղթել տղաներին, որպեսզի կարողանան դուրս գալ այս իրավիճակից։ Իհարկե, դա հեշտ չէ, բայց մենք արդեն ունեցել ենք նման փուլեր։ Պետք է աշխատել, և հաջողությունը կգա։

— Կարծիք կա, որ դուք հեռացել եք հավաքականից ֆեդերացիայի հետ կոնֆլիկտի պատճառով։ Եթե ղեկավարությունը փոխվի, հնարավո՞ր է ձեր վերադարձը։

— Չեմ ցանկանում այս թեման քննարկել։ Ժամանակը կգա՝ և դուք կիմանաք ճշմարտությունը։ Միայն կարող եմ ասել, որ դա իմ անձնական որոշումն էր, ոչ ոք ինձ չի ստիպել։ Այն պահին ես որոշեցի ավարտել միջազգային կարիերաս, և այժմ չեմ նախատեսում փոխել այդ որոշումը։

— Այսինքն՝ մոտ ապագայում դուք չեք վերադառնա՞։

— Չեմ վերադառնա։

Հարցին, թե որքան ժամանակ է նախատեսում շարունակել պրոֆեսիոնալ կարիերան, Մխիթարյանը պատասխանել է, որ կխաղա, քանի դեռ ֆիզիկական վիճակը թույլ է տալիս։ Երբ զգա, որ այլևս չի կարողանում դիմանալ ծանրաբեռնվածությանը, կմտածի կարիերան ավարտելու մասին։

«Միլան» - «Ինտեր» հանդիպումն ավարտվել է 1:1 հաշվով, Հենրիխ Մխիթարյանը խաղացել է 76 րոպե։