ՀՖՖ նախագահը շնորհավորել է Նիկիտա Սիմոնյանին 99-ամյակի կապակցությամբ
- Հեղինակ: Vahe Hakobyan
- Sportaran
Հայաստանի ֆուտբոլի ֆեդերացիայի նախագահ Արմեն Մելիքբեկյանը շնորհավորական ուղերձ է հղել լեգենդար ֆուտբոլիստ և մարզիչ Նիկիտա Սիմոնյանին՝ ծննդյան 99-րդ տարեդարձի առթիվ, հայտնում է ՀՖՖ մամուլի ծառայությունը։
Իր ուղերձում Մելիքբեկյանը նշել է Սիմոնյանի մեծ ներդրումը ֆուտբոլի զարգացման գործում՝ ընդգծելով, որ նրա նվիրվածությունը խաղին տասնամյակներ շարունակ օրինակ է հանդիսանում բազմաթիվ սերունդների մարզիկների համար։
«Հայաստանի ֆուտբոլի ֆեդերացիայի, հայ ֆուտբոլի բոլոր ներկայացուցիչների և անձամբ իմ անունից շնորհավորում եմ Ձեզ ծննդյան օրվա առթիվ։
Ձեր տարիների ընթացքում ֆուտբոլին ցուցաբերած նվիրումը ոգեշնչման աղբյուր է բոլոր նրանց համար, ովքեր կապված են այս խաղի հետ։
Ձեր ֆուտբոլիստի և մարզչի գործունեության նվաճումները ոսկե տառերով գրանցված են համաշխարհային և խորհրդային ֆուտբոլի պատմության մեջ։
Առանձնահատուկ ցանկանում եմ ընդգծել Ձեր անգնահատելի ներդրումը հայ ֆուտբոլի պատմության ամենամեծ նվաճումներից մեկում՝ “Արարատ”-ի 1973 թվականի հաղթանակում։
Մաղթում եմ Ձեզ քաջառողջություն, տոկունություն և անսպառ էներգիա», — ասված է Մելիքբեկյանի շնորհավորական ուղերձում։
Նիկիտա Պավլովիչ Սիմոնյանը, ով ծնվել է Ռուսաստանի Արմավիր քաղաքում, խորհրդային ֆուտբոլի պատմության ամենանշանավոր դեմքերից մեկն է։ Նա հայտնի է որպես մոսկովյան «Սպարտակի» փայլուն հարձակվող և մարզիչ, ով մեծ ներդրում է ունեցել ֆուտբոլի զարգացման գործում ԽՍՀՄ-ում և Հայաստանում։ Այսօր՝ հոկտեմբերի 12-ին, լեգենդար մարզիկը նշում է իր 99-ամյակը։
Քննարկեք նորությունները!
Անցնել մեկնաբանություններին ↓
Comments
0