«Պորտուն» սահմանել է իր առաջնահերթությունները․ Սպերցյանը՝ Գաբրի Վեյգայի այլընտրանքը

Պորտուգալական գրանդ «Պորտուն», որը նախկինում հետաքրքրություն էր ցուցաբերել Հայաստանի ազգային հավաքականի կիսապաշտպան Էդուարդ Սպերցյանի նկատմամբ, սահմանել է իր գլխավոր տրանսֆերային նպատակները այս ամառվա համար։ Ինչպես հաղորդում է fcporto.ws կայքը, ակումբի նոր նախագահ Անդրե Վիլաշ-Բոաշն ու սպորտային տնօրեն Անդոնի Սուբիսարետան նախատեսում են մոտ 70 միլիոն եվրոյի ներդրում կազմի ուժեղացման համար։

Գլխավոր խնդիրների թվում են՝ իսպանացի կիսապաշտպան Գաբրի Վեյգայի («Ալ Ահլի») ձեռքբերումը, կենտրոնական պաշտպանի և վինգերի որոնումը հարձակման խորությունը մեծացնելու նպատակով։ 23-ամյա Վեյգան box-to-box ոճի բազմաֆունկցիոնալ կիսապաշտպան է, որը հրաշալիորեն տեղավորվում է «դրակոնների» խաղաոճում՝ շնորհիվ հարձակմանը միանալու ու բարձր պրեսինգին մասնակցելու ունակության։

Ակումբին մոտ կանգնած աղբյուրների տեղեկություններով՝ «Պորտուն» արդեն շուրջ 15 միլիոն եվրոյի առաջարկ է արել Վեյգայի համար։ Դեռ հայտնի չէ՝ խաղացողը կընդունի՞ «Պորտուի» նախագիծը, հատկապես հաշվի առնելով Լա Լիգայի հնարավոր առաջարկները։

Այս համատեքստում Էդուարդ Սպերցյանի նկատմամբ հետաքրքրությունը շարունակում է պահպանվել, սակայն, կարծես թե, հայ ֆուտբոլիստը դիտարկվում է որպես Գաբրի Վեյգայի այլընտրանք։ Հիշեցնենք, որ ավելի վաղ պորտուգալական մամուլում հաղորդվում էր Սպերցյանի ընդգրկման մասին՝ որպես կիսապաշտպանությունը ուժեղացնող թեկնածու։

Այսպիսով, «Կրասնոդարի» առաջնորդի հետագա տրանսֆերային ճակատագիրը կարող է կախված լինել իսպանացու որոշումից, ինչպես նաև «Պորտուի» արդյունքներից Աշխարհի ակումբային առաջնությունում, որը մեկնարկում է հունիսի 15-ին։