Փադելը Հայաստանում ստանում է նոր զարգացման խթան

Հայաստանի փադելի ֆեդերացիան և կառուցվող Padel Battle մարզական ակումբը ստորագրել են ռազմավարական համագործակցության հուշագիր։ Փաստաթուղթն ուղղված է Հայաստանում փադելի զարգացմանը, ինստիտուցիոնալ հիմքերի ամրապնդմանը և սպորտի միջազգային առաջխաղացմանը։

Համաձայն հուշագրի՝ կողմերը համատեղ ջանքեր կգործադրեն փադելի հանրահռչակման, մարզիչների պատրաստման, թվային լուծումների ներդրման, ինչպես նաև կանոնավոր մրցաշարերի կազմակերպման ուղղությամբ։ Հատուկ ուշադրություն կդարձվի ներառականությանը, կայուն զարգացմանը և երիտասարդության ներգրավմանը սպորտային մշակույթին։

Հայաստանի փադելի ֆեդերացիան, որը գրանցվել է 2019 թվականին, հանդիսանում է Փադելի միջազգային ֆեդերացիայի (FIP) պաշտոնական անդամ։ Padel Battle ակումբը, որի բացումը նախատեսվում է առաջիկա ամիսներին Երևանում, կդառնա առաջինը երկրում, որն ամբողջությամբ համապատասխանում է FIP միջազգային չափանիշներին։

Հուշագիրը ստորագրել են՝ ֆեդերացիայի նախագահ Լուսինե Գասպարյանը, ով նաև հանդիսանում է Հայաստանի թենիսի ֆեդերացիայի տնօրենների խորհրդի անդամ, և Padel Battle-ի տնօրեն Նատալիա Կազանցևան, ով միաժամանակ հանդիսանում է LIONS հոկեյի ակումբի գլխավոր մենեջերը և համակարգում է իրավաբանական ու պետական հարաբերությունների ուղղությունները Հայաստանի հոկեյի լիգայում։

«Սա մեզ համար պարզապես ձևականություն չէ, այլ գիտակցված քայլ՝ Հայաստանում լիարժեք փադել միջավայր կառուցելու ճանապարհին։ Ֆեդերացիայի աջակցությունն կարևոր ազդանշան է, որ ընթանում ենք ճիշտ ուղղությամբ», — նշել է Նատալիա Կազանցևան։

«Փադելը աշխարհի ամենաարագ աճող սպորտաձևերից է, և մեր խնդիրն է՝ Հայաստանում ապահովել նրա կայուն զարգացումը։ Ուրախ ենք տեսնել Padel Battle-ը մեր գործընկերների թվում», — ասել է Լուսինե Գասպարյանը։

Առաջին համատեղ ծրագրերն ու Padel Battle ակումբի պաշտոնական բացումը նախատեսվում են 2025 թվականի աշնանը։