Պաշտոնական է. Գունկոն հեռացավ «Ուրարտու»-ից և գլխավորեց Տուլայի «Արսենալ»-ը

Ֆուտբոլային ակումբ «Ուրարտու»-ն հայտարարեց գլխավոր մարզիչ Դմիտրի Գունկոյի հետ պայմանագրի լուծման մասին՝ կողմերի փոխադարձ համաձայնությամբ։ Մասնագետը Երևանի թիմը գլխավորում էր 2022 թվականի ամառից և այդ ընթացքում անցկացրել է 119 հանդիպում՝ տոնելով 66 հաղթանակ։ Նրա ղեկավարությամբ «Ուրարտու»-ն դարձավ Հայաստանի չեմպիոն և Գավաթակիր 2022/23 մրցաշրջանում, իսկ Գունկոն ճանաչվեց տարվա լավագույն մարզիչ։

Ակումբը շնորհակալություն հայտնեց Դմիտրի Իվանովիչին՝ իր պրոֆեսիոնալիզմի, նվիրումի և թիմի զարգացմանը ներդրած մեծ ավանդի համար՝ ընդգծելով, որ նա դարձել էր ոչ միայն մարզիչ, այլ նաև իսկական առաջնորդ, ով ոգեշնչել է թիմին մեծ հաղթանակների։

Գունկոյի՝ «Ուրարտու»-ից հեռանալուց գրեթե անմիջապես հետո հայտնի դարձավ նրա նոր նշանակման մասին․ Դմիտրի Գունկոն գլխավորեց Տուլայի «Արսենալ»-ը։ 49-ամյա մասնագետը լավ ծանոթ է ռուսական ֆուտբոլի երկրպագուներին։ Նա երկար տարիներ աշխատել է Մոսկվայի «Սպարտակի» համակարգում՝ երեք անգամ նվաճելով երիտասարդական առաջնության հաղթողի տիտղոսը, իսկ 2014 թվականին ղեկավարել է ակումբի գլխավոր կազմը։ Նա նաև մարզել է Մերձմոսկովյան «Խիմկի»-ն, իսկ վերջին հինգ տարիները աշխատել է Հայաստանի առաջնությունում։

Հետաքրքիր է, որ որպես խաղացող՝ Գունկոն արդեն ներկայացրել է Տուլայի «Արսենալ»-ը․ 2001-ից 2003 թվականներին նա ակումբի կազմում անցկացրել է 71 խաղ և խփել 2 գոլ։

Նոր ակումբն արդեն ողջունել է մասնագետին՝ մաղթելով հաջողություններ և հաղթանակներ «Արսենալ»-ի կազմում։