Նոյել Միքայելյանը կպայքարի Բադու Ջեքի դեմ՝ WBC աշխարհի առաջին ծանր քաշային կարգում աշխարհի չեմպիոնի տիտղոսի համար

Հայ բռնցքամարտիկ Նոյել Միքայելյանը (27-2) ստացել է տիտղոսային մենամարտ շվեդ Բադու Ջեքի (28-3-3) դեմ՝ WBC վարկածով աշխարհի չեմպիոնի կոչման համար առաջին ծանր քաշային կարգում։ Մենամարտը տեղի կունենա մայիսի 3-ին Սաուդյան Արաբիայի Էր-Ռիադ քաղաքում՝ մասշտաբային բռնցքամարտի երեկոյի շրջանակում, որի գլխավոր մենամարտը կլինի Սաուլ Ալվարեսի և Ուիլիամ Սքալի դիմակայությունը։

34-ամյա Միքայելյանի համար այս մենամարտը հնարավորություն է՝ վերադարձնելու այն տիտղոսը, որը նա արդեն ունեցել է։ Հիշեցնենք, որ 2023 թվականի նոյեմբերին նա նվաճեց WBC աշխարհի գոտին՝ տպավորիչ նոկաուտով հաղթելով Իլունգա Մակաբուին։ Այդ ժամանակ տիտղոսը դարձել էր թափուր՝ Բադու Ջեքի հրաժարվելուց հետո։ Սակայն պարտադիր պաշտպանության բացակայության պատճառով գոտին հետ էր վերցվել Միքայելյանից։

Հիմա տիտղոսի ճակատագիրը կրկին որոշվելու է նրանց միջև, ովքեր նախկինում այն ունեցել են։ Դիմակայությունը խոստանում է թեժ լինել, իսկ Նոյելի համար սա հնարավորություն է՝ վերադարձնելու իր գոտին և ևս մեկ անգամ ապացուցելու, որ ինքը լավագույնն է այս դիվիզիոնում։