Նաիր Տիկնիզյանը զգաց Սերբիայում «հավերժական դերբիի» մթնոլորտը

Սերբիայի առաջնության 9-րդ տուրում, սեպտեմբերի 20-ին, «Ցրվենա Զվեզդան» արտագնա խաղում հաղթեց «Պարտիզանին» (2:1) և պահպանեց առաջատարի դիրքը Սուպերլիգայում։

Հաշիվը բացվեց 28-րդ րոպեին․ Տիմի Էլշնիկը գրավեց դարպասը։ 60-րդ րոպեին Նեմանյա Ռադոնյիչը կրկնապատկեց հյուրերի առավելությունը։ «Պարտիզանը» պատասխանեց միայն 74-րդ րոպեին՝ գոլի հեղինակ դարձավ Յովան Միշևիչը։

Հայաստանի հավաքականի և «Ցրվենա Զվեզդայի» պաշտպան Նաիր Տիկնիզյանը խաղը սկսեց հիմնական կազմում և անցկացրեց առաջին կեսը։ Միջմրցափուլում նրան փոխարինեցին դեղին քարտի պատճառով։

«Ցրվենա Զվեզդայի» գլխավոր մարզիչը խաղից հետո բացատրեց որոշումը․

«Տիկնիզյանը դեղին քարտ ստացավ և բարդություններ ուներ Դեմբա Սեկոյի դեմ մենամարտերում։ Չէինք ուզում ռիսկի դիմել երկրորդ քարտի և հնարավոր հեռացման պատճառով»։

SofaScore-ի տվյալներով՝ Տիկնիզյանը ստացավ 6.9 գնահատական և ակտիվ էր հարձակման գործողություններում։

Սակայն սերբական մամուլը ավելի խիստ էր․

Nova.rs — 5.5․ «Առաջին կեսում պաշտպանական թույլ օղակն էր։ Նրա ֆոնին Դեմբա Սեկը նմանվում էր աշխարհի լավագույն դրիբլերներից մեկին։ Միլոևիչը ստիպված եղավ փոխարինել նրան ընդմիջմանը»։

Sportklub — 5․ «Սեկը երկու անգամ անցավ նրան և հստակ ցույց տվեց Հայաստանի հավաքականի պաշտպանի խնդիրները, որոնք նկատվել են նաև «Լեխի» և հատկապես «Պաֆոսի» հետ խաղերում։ Էներգիայի և ակտիվության պակաս չկա հարձակման մեջ, բայց պաշտպանությունում վստահություն չի ներշնչում։ Փոխարինումն արդարացված էր․ հենց նա դարձավ ամենաթույլ խաղացողը՝ 45 րոպե անց հայտնվելով «մոխրագույն գոտում» և չկարողանալով դիմակայել Սեկոյին»։