Մեկ քայլ ավելի մոտ դեպի չեմպիոնություն․ «Կրասնոդարը» հաղթեց «Օրենբուրգին»

Ռուսաստանի Պրեմիեր Լիգայի նախավերջին տուրում «Կրասնոդարն» արտագնա հանդիպման ընթացքում կամային հաղթանակ տարավ «Օրենբուրգի» նկատմամբ։ Խաղն ավարտվեց 2:1 հաշվով՝ հօգուտ հյուրերի։

Հանդիպման հաշիվը բացեց «Օրենբուրգի» արգենտինացի հարձակվող Բրիան Մանսիլյան՝ արդեն 7-րդ րոպեին։ Սակայն 29-րդ րոպեին Ջոն Կորդոբան հավասարեցրեց հաշիվը։ Հաղթական գոլը 51-րդ րոպեին խփեց «ցլերի» պաշտպան Լուկաս Օլասան։

Այս հաղթանակը «Կրասնոդարին» մի քայլով մոտեցրեց պատմական չեմպիոնությանը։ Այժմ նրանք 4 միավորով առաջ են «Զենիթից», սակայն պետերբուրգցիներն ունեն մեկ խաղ պաշարում։ Եթե «Զենիթը» վաղը հաղթի «Ռոստովին», տարբերությունը կկազմի ընդամենը մեկ միավոր, և ամեն ինչ կվճռվի վերջին տուրում։ Այնտեղ «Կրասնոդարը» կհանդիպի «Դինամո Մոսկվայի» հետ, իսկ «Զենիթը»՝ «Ախմատի»։

«Կրասնոդարի» ավագ Էդուարդ Սպեռցյանը խաղադաշտում անցկացրեց 89 րոպե։ Նրա վիճակագրությունը խաղում հետևյալն է․

• Ճշգրիտ փոխանցումներ – 23 (71%)

• Բանալի փոխանցումներ – 2

• Երկար փոխանցումներ – 3-ից 3

• Հարվածներ – 3 (1 դարպասին)

• Հաջող դրիբլինգ – 6-ից 3

• Հաղթած մենամարտեր – 13-ից 7

• Գնդակի կորուստներ – 19

• Կատարած խախտումներ – 2

• Իր վրա եղած խախտումներ – 1

• Ինտերվենցիաներ – 1

• Խլումներ – 3

• SofaScore գնահատական – 7.4