Խվիչա Քվարացխելիայի կրտսեր եղբայրը ճանաչվել է ԵՄՖԱ-ի երեւանյան մրցաշարի լավագույն խաղացող

Երեւանում ավարտվեց Մինչեւ 14 եւ 15 տարեկանների համար նախատեսված ԵՄՖԱ-ի Զարգացման մրցաշարը, որին մասնակցեցին Հայաստանի, Վրաստանի, Լիբանանի, Լատվիայի եւ Ուզբեկստանի հավաքականները:

Մրցաշարի հերոսներից մեկը դարձավ 15-ամյա Տոռնիկե Քվարացխելիան՝ Վրաստանի ազգային հավաքականի եւ ՊՍԺ-ի աստղ Խվիչա Քվարացխելիայի կրտսեր եղբայրը: Տոռնիկեն, ով հանդես էր գալիս Վրաստանի Մ15 հավաքականում, օգնեց իր թիմին գրավել առաջին տեղը եւ ճանաչվեց մրցաշարի լավագույն խաղացող: Թանկարժեք մրցանակը երիտասարդ տաղանդին հանձնեց Հայաստանի ազգային հավաքականի գլխավոր մարզչի օգնական Արոն Վինտերը:

Մինչեւ 14 տարեկանների մրցաշարում Հայաստանի հավաքականը գրավեց երկրորդ տեղը՝ զիջելով Լիբանանի հասակակիցներին: Հայաստանի թիմի ավագ Նարեկ Ավետիսյանը («Փյունիկ») դարձավ իսկական առաջնորդ. նա յուրաքանչյուր խաղում խփեց գոլ եւ ավարտեց մրցաշարը 4 գնդակով: Նարեկը ճանաչվեց մրցաշարի լավագույն խաղացող իր տարիքային խմբում։ Նրան մրցանակը հանձնեց Հայաստանի ազգային հավաքականի գլխավոր մարզիչ Ջոն վանտ Սխիպը:

Մրցաշարը կայացավ մայիսի 8-ից 12-ը Երեւանում: