Միհրան Դերմենջյանը՝ Հայաստանի ֆուտզալի առաջնության 2024/25 մրցաշրջանի լավագույն խաղացող
- Հեղինակ: Vahe Hakobyan
- Sportaran
Հայաստանի ֆուտբոլի ֆեդերացիան ամփոփել է 2024/25 մրցաշրջանի ֆուտզալի արդյունքները։ Առաջնության լավագույն խաղացող է ճանաչվել «Երևան» ակումբի ավագն ու առաջնորդը՝ Միհրան Դերմենջյանը։
Հայաստանի հավաքականի ֆուտզալիստը դարձել է մայրաքաղաքային ակումբի չեմպիոնական ուղու առանցքային գործոններից մեկը՝ մրցաշրջանում խփելով 38 գոլ։ Նա հատկապես փայլեց եզրափակիչ սերիայում «Յունիսպորտի» դեմ՝ առաջին խաղում գրանցելով հեթ-տրիկ, իսկ վճռորոշ երրորդ հանդիպմանը՝ դուբլ, ապահովելով «Երևանի» ոսկե մեդալները։
Միհրան Դերմենջյանը հանդիսանում է «Ալաշկերտ» ֆուտբոլային ակումբի սան։ Մինչև 2021 թվականը նա հանդես է եկել մեծ ֆուտբոլում՝ որպես հարձակողական կիսապաշտպան՝ անցկացնելով 60 խաղ Հայաստանի Առաջին լիգայում և խփելով 14 գոլ։
Տարվա լավագույն մարզիչ է ճանաչվել չեմպիոնների գլխավոր մարզիչ Խաչատուր Միքայելյանը։
ՀՖՖ-ի կանոնակարգի համաձայն՝ լավագույն խաղացողն ու մարզիչը ստանում են 700,000 դրամ պարգևավճար։ Բացի այդ՝ առաջնության լավագույն ռմբարկուն ստանում է ևս 400,000 դրամ։ Ռմբարկուների ցուցակում Միհրան Դերմենջյանը («Երևան») և Համլետ Մուրադյանը («Լոգինակ») խփել են հավասար՝ 38 գոլ։ Թե ով կճանաչվի լավագույն ռմբարկու, և արդյոք կլինեն երկու հաղթողներ, դեռ պարզ չէ։
Քննարկեք նորությունները!
Անցնել մեկնաբանություններին ↓
Comments
0