Մանվել Խաչատրյանը հաղթեց թուրք մրցակցին և նվաճեց մինչև 23 տարեկանների Եվրոպայի առաջնության բրոնզը
- Հեղինակ: Vahe Hakobyan
- Sportaran
Հայաստանի հունահռոմեական ոճի ըմբիշ Մանվել Խաչատրյանը (55 կգ) նվաճել է 2026 թվականի մինչև 23 տարեկանների Եվրոպայի առաջնության բրոնզե մեդալը, որը անցկացվում է Սերբիայի Զրենյանին քաղաքում։
Երրորդ տեղի համար գոտեմարտում Խաչատրյանը վստահ հաղթանակ տարավ Թուրքիայի ներկայացուցիչ Սերչան Քեզգինի նկատմամբ։ Գոտեմարտը ավարտվեց ժամանակից շուտ՝ 9:0 հաշվով հօգուտ հայ մարզիկի։
Մեդալին հասնելու ճանապարհին Խաչատրյանը նաև համոզիչ հաղթանակ տարավ Ուկրաինայի ներկայացուցիչ Իվան Ստեֆանսկու նկատմամբ՝ 8:0 հաշվով։ Մրցաշարի կիսաեզրափակչում նա 0:4 հաշվով պարտվեց ռուսաստանցի Ալիբեկ Ամիրովին։
Հատկանշական է, որ ավելի վաղ Մանվել Խաչատրյանը արդեն դարձել էր մեծահասակների Եվրոպայի առաջնության բրոնզե մեդալակիր։ Այժմ նրա ակտիվում ավելացավ նաև մայրցամաքի երիտասարդական առաջնության մեդալը։
Խաչատրյանի բրոնզը դարձավ Հայաստանի հավաքականի առաջին մեդալը Զրենյանինում անցկացվող մինչև 23 տարեկանների Եվրոպայի առաջնությունում։ Միևնույն ժամանակ հայկական թիմին դեռ սպասվում են երեք եզրափակիչներ, ինչպես նաև երկու հնարավոր գոտեմարտ բրոնզե մեդալի համար։
Քննարկեք նորությունները!
Անցնել մեկնաբանություններին ↓
Comments
0