Ֆուտբոլային քաղաքացիությունը փոխելու համար փոխհատուցումներ․ հարված Գերմանիայից եկած հայկական տաղանդներին

Գերմանիայի ֆուտբոլային միությունը (DFB) մտադիր է նախաձեռնել փոփոխություններ միջազգային կանոններում՝ փոխհատուցում ստանալու համար այն դեպքերում, երբ Գերմանիայում պատրաստված երիտասարդ ֆուտբոլիստները ընտրում են հանդես գալ այլ ազգային հավաքականների կազմում։ Այս մասին dpa գործակալությանը տված հարցազրույցում ասել է DFB-ի գործադիր տնօրեն Անդրեաս Ռեթիգը։

Նրա խոսքով՝ ներկայիս համակարգը, ըստ որի բազմամյա պատրաստվածություն ստացած խաղացողը հետագայում անվճար անցնում է այլ հավաքականի դռները, «իմաստ չունի»։

«Մենք ուսումնասիրում ենք՝ արդյոք հնարավոր է ներդնել պատրաստվածության համար փոխհատուցման մեխանիզմ, երբ խաղացողը փոխում է ազգային ասոցիացիան։ Մարզչական աշխատանքը պետք է օգուտ տա ինչպես խաղացողին, այնպես էլ ֆեդերացիային», — ընդգծել է Ռեթիգը։

Ինչու է Գերմանիան բարձրացրել այս հարցը

Գերմանիան տասնամյակներ շարունակ բախվում է իրավիճակին, երբ միգրանտական արմատներով ֆուտբոլիստները ընտրում են ծնողների երկրի հավաքականները։ Միաժամանակ, հենց Գերմանիան է շահել միջազգային ընտանիքներից եկող տաղանդների ներհոսքից․ այդպիսիք են Իլքայ Գյունդոգանը, Մեսութ Օզիլը, Սամմի Խեդիրան և Ջերալդ Ասամոաը։

Խնդիրը օրեցօր ավելի է սրվում․ Գերմանիայում հինգ տարեկանից փոքր երեխաների 43 տոկոսն ունի կրկնակի քաղաքացիություն, իսկ երկրի որոշ երիտասարդական հավաքականներում խաղացողների մինչև 70 տոկոսը կարող են ընտրություն անել երկու կամ նույնիսկ երեք ֆուտբոլային ազգային պատկանելիությունների միջև։

Այս պայմաններում DFB-ն քննարկում է միասնական փոխհատուցման մեխանիզմի ստեղծման հնարավորությունը, սակայն դրա իրագործումը հնարավոր կլինի միայն FIFA-ի հավանությամբ։ Եթե համակարգը ներդրվի, այն պետք է պահպանեն բոլոր երկրները։

Ինչ է դա նշանակում Հայաստանի համար

Հայկական ֆուտբոլը նույնպես կարող է զգալ Գերմանիայի նախաձեռնության հետևանքները։ Վերջին տարիներին Հայաստանի հավաքականը կարևոր համալրում է ստացել գերմանական ֆուտբոլային համակարգում մեծացած մի շարք խաղացողներից։

Սարգիս Ադամյանը և Ալեքսանդր Կարապետյանը առաջին նկատելի օրինակներն են գերմանական ակումբների դպրոցը անցած ու Հայաստանը ընտրած ֆուտբոլիստների։

Այսօր հավաքականի գերմանական դպրոցի հիմնական ներկայացուցիչն է Մյոնխենգլադբախի «Բորուսիայում» հանդես եկող հարձակվող Գրանտ-Լեոն Ռանոսը։

Ապագայում կարող են միանալ նաև Գերմանիայի երիտասարդական հավաքականներում հանդես եկող Մարկ և Մայք Գևորգյան եղբայրները, ինչպես նաև մի շարք այլ հայ երիտասարդ ֆուտբոլիստներ՝ մասնավորապես Էնթոնի Սարդարյանը և ուրիշներ։

Եթե FIFA-ն հաստատի փոխհատուցումների գաղափարը, Հայաստանն էլ, ինչպես մյուս երկրները, հնարավոր է ստիպված լինի վճարել որոշակի գումարներ այն խաղացողների համար, որոնք պատրաստվել են Գերմանիայի ֆուտբոլային համակարգում, բայց ընտրել են ելույթ ունենալ հայկական դրոշի ներքո։

Մինչև այժմ դա միայն քննարկում է, բայց միտումը ակնհայտ է

Փոխհատուցումների հարցը ծագել է ֆուտբոլային քաղաքացիությունների միջև անցումների աճի ներքո։ Գերմանիան արդեն ունեցել է դեպքեր, երբ երիտասարդ խաղացողները ընտրել են այլ երկրներ՝ Իբրահիմ Մազա (Ալժիր), Մուհամմեդ Դամար (Թուրքիայի հետաքրքրություն), Նիկոլո Տրեզոլդի (Իտալիայի հետաքրքրություն) և Ֆաբիո Գրուբեր (Պերու)։

DFB-ի առաջարկը դեռ մնում է քննարկումների մակարդակում, սակայն ինքը՝ քննարկման փաստը, ցույց է տալիս, որ խոշորագույն ֆուտբոլային ֆեդերացիաները ձգտում են վերանայել երիտասարդների պատրաստման մոտեցումները և պաշտպանել իրենց ներդրումները։

Հայաստանի համար սա նշանակում է անհրաժեշտություն ուշադիր հետևել գործընթացին, քանի որ այն կարող է ազդել հայկական ծագմամբ տաղանդներ ներգրավելու ռազմավարության վրա։