«Շիրակ» ակումբը Գյումրու ֆուտբոլի ակադեմիան հետ է հանձնում ՀՖՖ-ին՝ դժբախտ պատահարի և Ֆեդերացիայի անգործության ֆոնին
Ֆուտբոլային ակումբ «Շիրակ»-ը պաշտոնական հայտարարություն է տարածել, որում տեղեկացնում է Գյումրու ֆուտբոլի ակադեմիան Հայաստանի ֆուտբոլի ֆեդերացիային (ՀՖՖ) վերադարձնելու մասին։ Պատճառը 2023 թվականի դեկտեմբերի 29-ին տեղի ունեցած ողբերգական դեպքն է, ինչպես նաև, ակումբի ձևակերպմամբ, ՀՖՖ-ի լիակատար անտարբերությունը դրան հաջորդած ժամանակահատվածում։
Այդ օրը, ուժգին քամու հետևանքով, ակադեմիայի տարածքում փլուզվել էր մոտ 25 մետրանոց պատի հատված, ինչի հետևանքով մահացել էր քաղաքացի։ Դեպքի առթիվ հարուցվել է քրեական գործ։
Տեղի ունեցածից անմիջապես հետո «Շիրակ»-ը պատշաճ կերպով տեղեկացրել է ՀՖՖ-ին, որը հանդիսանում է ակադեմիայի ենթակառուցվածքների նոմինալ սեփականատերը։ Սակայն ակումբը պնդում է, որ մեկուկես տարվա ընթացքում Ֆեդերացիայից որևէ ներկայացուցիչ չի այցելել ակադեմիա՝ տեղում իրավիճակին ծանոթանալու նպատակով։
«Մենք բազմիցս դիմել ենք ՀՖՖ-ին՝ ակադեմիայի շինարարական փաստաթղթերը ստանալու, ինչպես նաև համատեղ աշխատանքային խումբ ձևավորելու առաջարկով՝ արձանագրելու շինարարական և անվտանգային խնդիրները։ Սակայն շարունակաբար բախվել ենք Ֆեդերացիայի ղեկավարության լիակատար անտարբերությանը», — նշված է ակումբի հայտարարության մեջ։
Ընդգծելով ակադեմիայի սաների անվտանգության առաջնահերթությունը և նման ողբերգությունների կրկնության հավանականությունը նվազեցնելու նպատակով՝ «Շիրակ»-ը հայտարարում է Գյումրու ֆուտբոլի ակադեմիան ՀՖՖ-ին հետ հանձնելու որոշման մասին։
Քննարկեք նորությունները!
Անցնել մեկնաբանություններին ↓
Comments
0