Հայաստանի հավաքականի ավագը՝ Պորտուգալիայից ստացած դասի, Ռոնալդուի հետ հանդիպման և Հունգարիայի դեմ խաղի մասին

Հայաստանի հավաքականի ավագը և բրատիսլավյան «Սլովանի» կիսապաշտպան Տիգրան Բարսեղյանը հունգարական Nemzeti Sport պարբերականին տված հարցազրույցում խոսել է առաջիկա հանդիպումից իր սպասելիքների մասին՝ Հունգարիայի դեմ աշխարհի առաջնության ընտրական փուլի շրջանակում, ինչպես նաև հիշել է հանդիպումը Քրիշտիանու Ռոնալդուի հետ և հաղթանակը Իռլանդիայի նկատմամբ։

Բարսեղյանը նշել է, որ Պորտուգալիայից 0:5 հաշվով պարտությունը դարձել է լավ դաս Հայաստանի հավաքականի համար․

«Մենք գիտեինք՝ ում դեմ ենք խաղում՝ աշխարհի լավագույն ֆուտբոլիստներից մի քանիսի։ Պորտուգալացիները Ազգերի լիգայի գործող չեմպիոններն են։ Սակայն այդ պարտությունը մեզ համար զգուշացում էր․ հույները (նկատի ունի հունգարացիներին) սեփական դաշտում նրանց զիջեցին ընդամենը մեկ գնդակի տարբերությամբ, և դա շատ բան է ասում Մարկո Ռոսսիի հավաքականի ուժի մասին», — ասել է Հայաստանի հավաքականի ավագը։

Ֆուտբոլիստը նաև հիշել է զվարճալի դրվագ Քրիշտիանու Ռոնալդուի հետ․

«Երկրորդ խաղակեսում նա ինձ հարցրեց, թե ինչու ենք այսքան խորը պաշտպանվում և չենք փորձում գոլ խփել։ Ես պատասխանեցի՝ եթե դա այդքան հեշտ լիներ։ Նա կատակեց՝ ասելով, թե ինքն առաջինը կխփի, հետո հերթը իմն է։ Եվ իրոք, կես րոպե անց նա գոլ խփեց ու ցույց տվեց, որ այժմ իմ հերթն է», — պատմել է Բարսեղյանը։

Հայաստանի հավաքականի ավագը շեշտել է, որ թիմը մեծ ցանկությամբ է հաղթանակ տարել Իռլանդիայի նկատմամբ (2:1)․

«Մենք ավելի քան մեկ տարի չէինք հաղթել սեփական դաշտում, այդ պատճառով խաղում էինք սրտով ու հոգով։ Ներքին դաշտի երկրպագուները շատ օգնեցին մեզ, մարզադաշտը լիքն էր՝ ինչպես հունգարացիների դեպքում», — նշել է նա։

Խոսելով առաջիկա հանդիպման մասին Բուդապեշտում՝ Բարսեղյանը ընդունել է, որ ֆավորիտը Հունգարիան է․

«Հունգարացիները հիանալի թիմ ունեն, շատերը հանդես են գալիս առաջատար ակումբներում, և նրանց հետևում կլինի 60 հազար երկրպագու։ Բայց հանդիպումը սկսվում է 0:0 հաշվից, և մենք դաշտ դուրս չենք գա բարձրացրած ձեռքերով։ Կպայքարենք մինչև վերջ», — ընդգծել է Հայաստանի ավագը։

Բարսեղյանը նաև հավելել է, որ խմբում երկրորդ տեղի ճակատագիրը կարող է որոշվել արդեն առաջիկա տուրերից հետո․

«Խմբի ճակատագիրը կարող է որոշվել Բուդապեշտի և Դաբլինի խաղերում։ Դրանցից հետո պարզ կդառնա, թե ով կմնա փլեյ-օֆֆի պայքարում», — եզրափակել է նա։

Հունգարիա – Հայաստան հանդիպումը տեղի կունենա հոկտեմբերի 11-ին, Բուդապեշտի «Պուշկաշ Արենայում»։