Գրանտ-Լեոն Ռանոսը առաջին անգամ մեկնարկային կազմում էր «Այնտրախտ Բրաունշվայգում»

Հայաստանի ազգային հավաքականի հարձակվող Գրանտ-Լեոն Ռանոսը առաջին անգամ ընդգրկվել է «Այնտրախտ Բրաունշվայգի» ակումբի մեկնարկային կազմում։ Մինչ այդ 22-ամյա ֆուտբոլիստը երեք անգամ խաղադաշտ էր դուրս եկել միայն փոխարինման կարգով։

Դա տեղի ունեցավ Գերմանիայի Երկրորդ Բունդեսլիգայի 25-րդ տուրի «Պադերբորնի» դեմ խաղում։ Հայ հարձակվողը խաղը սկսեց առաջին րոպեներից և հանդես եկավ աջ վինգերի դիրքում։

Սակայն Ռանոսը խաղադաշտում անցկացրեց միայն առաջին խաղակեսը։ Ընդմիջումից հետո մարզչական շտաբը նրան փոխարինեց՝ խաղադաշտ դուրս բերելով Ռոբին Հոյսերին, և հենց նա էլ շուտով դարձավ առաջին գոլի հեղինակը․ կիսապաշտպանը աչքի ընկավ 52-րդ րոպեին։

Չնայած փոխարինմանը՝ Ռանոսի խաղահատվածը կարելի է գնահատել դրական։ Նա հաճախ չէր ստանում գնդակը, սակայն ակտիվորեն օգնում էր թիմին պաշտպանությունում և օգտակար էր ստեղծագործ խաղում՝ կատարելով 2 կարևոր փոխանցում։ Առաջին խաղակեսի վերջնամասում հայ ֆուտբոլիստը կատարեց հիանալի արագացում և իր թիմակցին դուրս բերեց հարվածի դիրք, սակայն պահը չհաջողվեց իրացնել։

Երկրորդ խաղակեսում «Այնտրախտ Բրաունշվեյգը» չկարողացավ պահել առավելությունը և խաղն ավարտվեց 1:1 հաշվով։ 67-րդ րոպեից թիմը խաղում էր փոքրամասնությամբ՝ Պատրիկ Նկաոյի հեռացումից հետո, իսկ «Պադերբորնը» հավասարեցրեց հաշիվը 99-րդ րոպեին։

Գրանտ-Լեոն Ռանոսի վիճակագրությունը խաղում

• Խաղացած րոպեներ՝ 45
• Կարևոր փոխանցումներ՝ 2
• Ճշգրիտ փոխանցումներ՝ 5/8 (63%)
• Գնդակի կորուստներ՝ 9
• Հաջող դրիբլինգներ՝ 4
• Խլումներ՝ 2
• Կտրումներ՝ 1
• Գնդակի հեռացումներ՝ 3
• Գնդակի վերադարձներ՝ 1
• Մենամարտեր՝ 2/2
• SofaScore գնահատական՝ 7.0

«Այնտրախտ Բրաունշվայգը» հաջորդ խաղը կանցկացնի մարտի 14-ին՝ «Ֆորտունա Դյուսելդորֆի» դեմ։

Այսօր նաև Հայաստանի հավաքականի պաշտպան Ստյոփա Մկրտչյանը խաղացել է «Նյուրնբերգի» կազմում Երկրորդ Բունդեսլիգայում։