Ֆին Գերագուսյանը կարող է հնարավորություն ստանալ «Սանդերլենդի» հիմնական կազմում մրցաշրջանի վերջում

Երիտասարդ հայ հարձակվող Ֆին Գերագուսյանը կարող է իր նորամուտը նշել «Սանդերլենդի» հիմնական թիմում Չեմփիոնշիփի վերջին տուրերում։ Այս մասին գրում է Sunderland Echo-ն՝ նշելով, որ ակումբի գլխավոր մարզիչ Ռեժիս Լե Բրիսը կարող է մրցաշրջանի վերջին խաղերն օգտագործել կազմի հետ փորձարկումներ կատարելու համար։

«Սանդերլենդն» արդեն ապահովել է փլեյ-օֆֆի ուղեգիր՝ Պրեմիեր լիգա դուրս գալու համար, ինչն ապահովում է հանգիստ ավարտ մրցաշրջանի համար։ Սա մարզչական շտաբին հնարավորություն է տալիս փորձարկել այն ֆուտբոլիստներին, ովքեր մինչ այս եղել են հիմնական կազմի եզրերին, այդ թվում՝ ակադեմիայի երիտասարդ տաղանդներին։

Նման խաղացողների թվում հրապարակումը հիշատակում է 17-ամյա Գերագուսյանին, ով վերջերս ինքնավստահ հանդես է գալիս U21 թիմի կազմում։ Չնայած իր երիտասարդ տարիքին՝ նա արդեն աչքի է ընկնում որպես հզոր, «հին դպրոցի» կենտրոնական հարձակվող՝ լուրջ ֆիզիկական առավելությամբ և բարձր պոտենցիալով։

Ֆին Գերագուսյանը հանդես է գալիս Հայաստանի պատանեկան հավաքականի կազմում և համարվում է իր տարիքային խմբի ամենահեռանկարային ֆուտբոլիստներից մեկը։ Հրապարակումը նշում է, որ նա անկասկած «ապագայի թոփ խաղացող» է։

Ընթացիկ մրցաշրջանում Գերագուսյանը խփել է 5 գոլ և կատարել է 5 գոլային փոխանցում U21 թիմում, ինչպես նաև խփել է 8 գոլ և կատարել 4 գոլային փոխանցում U19 թիմում։