ՀՖՖ-ն անցկացրեց մամուլի ասուլիս. հավաքականի տարիքային խնդիրները, նոր ծրագրեր և բախումներ լրագրողների հետ

Այսօր՝ ապրիլի 9-ին, «Հանրապետական» մարզադաշտում տեղի ունեցավ Հայաստանի ֆուտբոլի ֆեդերացիայի լայնածավալ մամուլի ասուլիսը։ Լրագրողների հարցերին պատասխանեցին ՀՖՖ նախագահ Արմեն Մելիքբեկյանը, փոխնախագահ Արմեն Նիկողոսյանը և գլխավոր քարտուղար Արթուր Ազարյանը։ Ֆեդերացիայի ղեկավարները անդրադարձան ինչպես հայկական ֆուտբոլի ներկա վիճակին, այնպես էլ ապագա ծրագրերին։

Ասուլիսի կարևոր թեմաներից մեկը Հայաստանի ազգային հավաքականի տարիքային խնդրին էր նվիրված։ Այս մասին մենք գրել էինք դեռ տարեսկզբին։ Մելիքբեկյանը նշեց, որ սա լուրջ մարտահրավեր է։ Նրա խոսքերով՝ հավաքականի ներկայիս կազմի միջին տարիքը խնդրահարույց է, և ապագայում իրավիճակը պետք է փոխվի։ Սակայն նա չներկայացրեց կոնկրետ լուծումներ։ Բնականաբար ծագում է հարցը՝ ինչպես երիտասարդացնել հավաքականը, եթե երիտասարդական թիմերը երկար ժամանակ է, ինչ դրական արդյունքներ չեն գրանցում։

Բացի այդ, ՀՖՖ-ն ներկայացրեց առաջիկա տարիների իր հավակնոտ ծրագրերը․

• ազգային մարզադաշտի կառուցում,

• պրոֆեսիոնալ ֆուտբոլային լիգայի ստեղծում (թեև ակումբների միջև դեռևս չկա համախմբվածություն),

• Վրաստանի հետ համատեղ հայտ՝ անցկացնելու մինչև 20 տարեկանների աշխարհի առաջնությունը 2029 թվականին,

• ստորին դիվիզիոնների ընդլայնում և մրցաշարային համակարգի բարեփոխում։

Մելիքբեկյանն, անդրադառնալով հրաժարականի հնարավորությանը, ասաց, որ նման որոշում կարող է կայացնել միայն ՀՖՖ գործադիր կոմիտեն։

Ասուլիսը չէր անցել առանց միջադեպերի։ Որոշ լրագրողների հետ տեղի ունեցան բախումներ, իսկ որոշ քաղաքական հարցեր առաջացրին դժգոհություն ֆեդերացիայի ներկայացուցիչների շրջանում։

VIDEO: