Էլինա Ավանեսյանը դուրս է եկել Մադրիդի մրցաշարի քառորդ եզրափակիչ

Հայաստանի ներկայացուցիչ Էլինա Ավանեսյանը (WTA 367) վստահ շարունակում է ելույթները Մադրիդում անցկացվող WTA 125 կարգի մրցաշարում։ 1/8 եզրափակչի խաղում նա երկու սեթում հաղթել է բրիտանացի թենիսիստուհի Ֆրանչեսկա Ջոնսին (WTA 100)՝ 6-2, 6-2 հաշվով։

Ավելի վաղ հայ թենիսիստուհին հաղթել էր իսպանուհի Անդրեա Լասարո Գարսիային, որը զբաղեցնում է համաշխարհային վարկանիշի 146-րդ տեղը։ Հանդիպումն ավարտվել էր Ավանեսյանի հաղթանակով՝ 6:4, 7:5 հաշվով։

Հայ մարզուհին երկու հանդիպումներում էլ ցուցադրել է կայուն խաղ հետնագծում և վստահ է անցկացրել սեթերի վերջնամասերի կարևոր միավորները։

Ավելի վաղ, որակավորման փուլում, Ավանեսյանը հաջողությամբ հաղթահարել էր երկու մրցակցուհիների՝ ֆրանսուհի Սելենա Յանիշևիչին և Եկատերինա Կազիոնովային, ինչը նրան հնարավորություն էր տվել հայտնվել հիմնական ցանցում։

Մադրիդի մրցաշարը շարունակում է մնալ կարևոր փուլ վարկանիշային միավորներ հավաքելու համար։ Տարվա սկիզբը Ավանեսյանի համար անհաջող էր՝ վնասվածքից վերադառնալուց հետո նա չէր կարողանում հաղթահարել նույնիսկ մեկ մրցակցուհու։ Սակայն այժմ նրա խաղը մեծ հույսեր է ներշնչում։