Էլինա Ավանեսյան. «Հպարտ եմ, որ դարձա առաջին հայուհին WTA-ի լավագույն 40-ի մեջ»

WTA500 Մերիդայի կիսաեզրափակչում կրած պարտությունից հետո հայ թենիսիստուհի Էլինա Ավանեսյանը առաջին անգամ իր կարիերայում հայտնվեց աշխարհի դասակարգման լավագույն 40-ի մեջ։

22-ամյա հայ մարզուհին մրցաշարից հետո գրառում կատարեց իր սոցիալական ցանցերում.

«Առաջին կիսաեզրափակիչը WTA500-ում։ Չկարողացա 100%-ով խաղալ վնասվածքի պատճառով, բայց պայքարեցի մինչև վերջ։

Իմ կարիերայի բարձրագույն դասակարգմանն եմ հասել և հպարտ եմ, որ դարձա առաջին հայուհին WTA-ի լավագույն 40-ի մեջ. այս ձեռքբերումը շատ մեծ նշանակություն ունի ինձ համար։ Շատ շնորհակալ եմ այս ճանապարհի համար և մեծ մոտիվացիա ունեմ առաջ նայելու» – գրել է Էլինա Ավանեսյանը Մերիդայի կիսաեզրափակչից հետո։

Արդեն մարտի 5-ին Էլինան կմեկնարկի Indian Wells-ի մրցաշարում և 1/64 եզրափակչում կհանդիպի Լորեն Դևիսին, որին նա հաղթել էր իր առաջին հանդիպման ժամանակ Հայաստանի դրոշի ներքո՝ 2024 թվականի օգոստոսին՝ Ցինցինատի Օփենում։

Այդ հանդիպումն ավարտվեց Ավանեսյանի հաղթանակով՝ 6-3, 6-1 հաշվով։