Եղիշե Մելիքյան. «Պարտավոր էինք հաղթել այս թիմին, բայց վստահ եմ, որ կանցնենք առաջ»

«Փյունիկի» գլխավոր մարզիչ Եղիշե Մելիքյանը մեկնաբանեց իր թիմի պարտությունը Սան Մարինոյի «Տրե Ֆիորիից» (0:1) Կոնֆերենցիաների լիգայի որակավորման առաջին փուլի առաջին խաղում։ Խաղը կայացավ հուլիսի 10-ին՝ Սան Մարինոյում։

Եղիշե Մելիքյանի մամուլի ասուլիսից.
– Շատ տհաճ է, մենք պարտավոր էինք հաղթել այս թիմին։ Բայց վստահ եմ, որ մեր հարկի տակ կհասնենք մեզ անհրաժեշտին ու կանցնենք հաջորդ փուլ։ Այսօր մեր օրը չէր, շատ անհաջողակ էինք։ Բայց չեմ ցանկանում արդարացումներ գտնել այսպիսի խաղի համար։ Ընդունում ենք պարտությունը, կվերլուծենք։ Վստահ եմ, որ Երևանում կհաղթենք։

Իմ փորձից ելնելով՝ սա անհրաժեշտ էր, որ որոշ տղաներ փորձ ձեռք բերեին ու դաս ստանային։ Չեմ կարող բացահայտել՝ ինչի մասին եմ խոսում, բայց դա ցույց է տալիս, որ ճիշտ էի։ Թող սա լինի դաս մեզ համար։

Չեմ կարող ասել, որ թերագնահատել ենք մրցակցին։ Խաղի սկզբում շատ գոլային պահեր բաց թողեցինք։ Կարող էինք խոշոր հաշվով հաղթել, բայց եղավ այն, ինչ եղավ։ Մեր նորեկները ուշ են միացել թիմին, դեռ լավագույն մարզավիճակում չեն։ Շատերի համար սա առաջին պաշտոնական խաղն էր 2–3 ամսվա ընթացքում։ Առաջին պաշտոնական խաղերը միշտ դժվար են։

Բայց նորից եմ կրկնում՝ պարտավոր ենք անցնել այս թիմին ու կանցնենք։

Մեզ մոտ պահեստայինների թվում լավ մարզավիճակում ֆուտբոլիստներ չկային, ուստի չկարողացանք փոխել խաղի ընթացքը։ Ունենք լավ խաղացողներ, բայց նրանք դեռ պետք է մարզավիճակ հավաքեն։

Մաթաս Վարեյկեն վնասվածք ուներ, նոր էր սկսել մարզվել և պատրաստ չէր խաղալու։ Կարծում եմ՝ պատասխան խաղում մի քանի րոպե խաղալու հնարավորություն կունենա։ Նա շատ կարևոր խաղացող է, բայց չենք շտապում։ Նա վնասվածքների նկատմամբ հակված է, ուստի պետք է զգույշ մոտենանք։

Մարիուս Նուբիսին ընդամենը մեկ շաբաթ առաջ միացավ թիմին, դեռ պատրաստ չէր խաղալու։ Ես էլ ծրագրած չէի նրան դաշտ դուրս բերել, բայց որոշեցի ռիսկի դիմել։ Լավ է, որ վնասվածք չստացավ։

Շատ շնորհակալ եմ այն երկրպագուներին, ովքեր հասել էին Սան Մարինո։ Նրանց համար կանի ամեն ինչ՝ Երևանում հաղթելու համար։

Ընդհանրապես, մեզ մոտ առաջին պաշտոնական խաղերն ավելի վատ են անցնում, բայց հետո լավանում ենք։ Կարծում եմ՝ այս անգամ էլ այդպես կլինի։