Էդուարդ Վարդանյանն ու Արմեն Գուլյանը նոր MMA մրցաշար են մեկնարկում Հայաստանում

Հայաստանում կմեկնարկի խառը մենամարտերի նոր մրցաշար։ Հայտնի MMA մարտիկներ Էդուարդ Վարդանյանն ու Արմեն Գուլյանը հայտարարել են ARMAT FIGHT SHOW նախագծի ստեղծման մասին՝ հայկական մարտարվեստների նոր սերնդի լիգա։

Առաջին մրցաշարը տեղի կունենա ապրիլի 18–19-ին Երևանում։ Մրցումները նպատակ ունեն որոշել երկրի ամենաուժեղ մարտիկներին և հնարավորություն տալ երիտասարդ մարզիկներին ներկայանալ մեծ բեմում։

Կազմակերպիչների խոսքով՝ լիգան կհամախմբի հայկական MMA-ի լավագույն ներկայացուցիչներին և կդառնա հարթակ նրանց համար, ովքեր պատրաստ են ապացուցել, որ արժանի են հանդես գալ պրոֆեսիոնալ մակարդակում։

Մրցաշարի ձևաչափը

Գլխավոր իրադարձությունը կլինի Հայաստանի ուժեղագույն մարտիկների գրան-պրին, որը կանցկացվի ընտրական ձևաչափով ութ քաշային կարգերում։ Յուրաքանչյուր դիվիզիոնում կորոշվի առանձին հաղթող։

Մրցաշարը կանցկացվի երկու փուլով.

• Ընտրական մենամարտեր — սիրողական ձևաչափով

• Եզրափակիչ մենամարտեր — պրոֆեսիոնալ ձևաչափով

Եզրափակիչները կանցկացվեն մեկ քարտում հայկական MMA-ի աստղերի մասնակցությամբ։

Մրցաշարի ընդհանուր մրցանակային ֆոնդը կգերազանցի 15 000 000 դրամը։

Յուրաքանչյուր քաշային կարգում նախատեսված են հետևյալ պարգևները.

• 1-ին տեղ — 1 000 000 դրամ

• 2-րդ տեղ — 500 000 դրամ

• 3-րդ տեղ — 200 000 դրամ

Գրան-պրիին մասնակցելու համար հայտ կարելի է ներկայացնել լիգայի պաշտոնական էջում՝
https://t.me/armatfs

«Առյուծի Սիրտ» ակադեմիա

Հիշեցնենք, որ 2025 թվականից Հայաստանում գործում է մարտարվեստների «Առյուծի Սիրտ» ակադեմիան, որտեղ Արմեն Գուլյանը զբաղեցնում է գլխավոր մարզչի պաշտոնը։ Նոր մրցաշարը կդառնա հայկական MMA-ի զարգացման և տաղանդավոր մարտիկների հայտնաբերման ու առաջխաղացման համակարգ ստեղծելու հերթական քայլը։