Էդգար Մանուչարյանը մեկնաբանել է Ջոն վան'թ Սխիպի՝ Հայաստանի հավաքականի գլխավոր մարզչի պաշտոնում նշանակումը

«Այաքսի» և Հայաստանի ազգային հավաքականի նախկին ֆուտբոլիստ Էդգար Մանուչարյանը խոսել է Ջոն վան'թ Սխիպի՝ Հայաստանի հավաքականի գլխավոր մարզչի պաշտոնում նշանակման մասին։

«Ես անձամբ չեմ ճանաչում Ջոն վան'թ Սխիպին։ Երբ ես խաղում էի «Այաքսում», նա Նիդեռլանդների հավաքականում Մարկո վան Բաստենի օգնականն էր։ Կարծում եմ, որ նա փորձառու մասնագետ է, բայց ժամանակը ցույց կտա», – նշել է Մանուչարյանը Armenpress-ին տված հարցազրույցում։

Նա նաև ընդգծել է, որ մարզիչն ունի երկար տարիների փորձ և հույս է հայտնել, որ նա հաջողության կհասնի Հայաստանի հավաքականի հետ. «Նիդեռլանդների և Հայաստանի միջև զգալի տարբերություններ կան, այդ թվում՝ մտածելակերպի մեջ։ Սակայն ֆուտբոլային տեսանկյունից այս երկրները նման են։ Հայաստանում կան տեխնիկապես տաղանդավոր ֆուտբոլիստներ, և կարծում եմ, որ վան'թ Սխիպին ժամանակ է պետք՝ հարմարվելու և թիմի ներուժը բացահայտելու համար», – ասել է Էդգար Մանուչարյանը Armenpress.am-ին տված հարցազրույցում։

Հիշեցնենք, որ Հայաստանի ֆուտբոլի ֆեդերացիան պաշտոնապես հայտարարել է 61-ամյա հոլանդացի մասնագետ Ջոն վան'թ Սխիպի՝ ազգային հավաքականի գլխավոր մարզիչ նշանակվելու մասին։ ՀՖՖ նախագահ Արմեն Մելիքբեկյանը մարզչին ներկայացրել է գործկոմի անդամներին, ովքեր միաձայն հաստատել են նրա թեկնածությունը։ Պայմանագիրը կնքվել է 1+1 ձևաչափով, իսկ վան'թ Սխիպը իր պարտականությունները կստանձնի 2025 թվականի մարտի 1-ին։