Ջեյք Փոլը ժամանել է Երևան՝ Արման Ծառուկյանի մոտ. շքեղ ընթրիք, զբոսանք քաղաքի կենտրոնում և հնարավոր մեդիա-նախագիծ

Ամերիկացի YouTube-բլոգեր և պրոֆեսիոնալ բռնցքամարտիկ Ջեյք Փոլը ժամանել է Երևան, որտեղ հանդիպել է UFC-ի թեթև քաշային կարգի առաջատար հավակնորդ Արման Ծառուկյանին։ Աստղերին նկատել են Հանրապետության հրապարակում զբոսնելիս՝ մայրաքաղաքի ռեստորաններից մեկում ավանդական հայկական ընթրիքից հետո։

Ինչպես հայտնի է դարձել, Ծառուկյանը Հայաստան է հրավիրել երկու ազդեցիկ բլոգերի՝ Ջեյք Փոլին և ռուսաստանյան մեդիաանձնավորություն Միխայիլ Լիտվինին։ Նրանք արդեն հասցրել են շքեղ ընթրել, զբոսնել Երևանի կենտրոնում և շփվել երկրպագուների հետ։

Հրապարակված տեսանյութերից մեկում երևացել է նաև հայկական ազատ ոճի ըմբիշ Արսեն Հարությունյանը։ Կատակով Ծառուկյանը Ջեյք Փոլին առաջարկել է Հայաստան բերել իր նշանածին, որպեսզի նա «ձեռքը դնի գլխին» Հարությունյանին՝ օլիմպիական ոսկի նվաճելուց առաջ հաջողության համար։

Հիշեցնենք, որ ընդամենը երկու օր առաջ Ջեյք Փոլի նշանածին՝ նիդեռլանդացի գեղասահորդ Յուտտա Լերդամը, դարձել է 2026 թվականի Միլան-Կորտինայի ձմեռային Օլիմպիական խաղերի չեմպիոն։ Փոլը ներկա է եղել մրցումներին, իսկ այժմ ժամանել է Հայաստանի մայրաքաղաք։

Ակնկալվում է, որ աստղային եռյակի այցը չի սահմանափակվի զբոսաշրջային ծրագրով։ Փոլի, Ծառուկյանի և Լիտվինի հետ Հայաստան է ժամանել նաև օպերատորների և լուսանկարիչների մեծ թիմ։ Ամենայն հավանականությամբ, Երևանում նկարահանվում է լայնամասշտաբ մեդիա-նախագիծ, որի մանրամասները դեռ գաղտնի են պահվում։

Այցն արդեն մեծ արձագանք է առաջացրել սոցիալական ցանցերում և կարող է դառնալ կարևոր տեղեկատվական իրադարձություն ինչպես հայկական լսարանի, այնպես էլ UFC-ի և բլոգոսֆերայի միջազգային երկրպագուների համար։