Գերագուսյանի դուբլը օգնեց «Սանդերլենդին» դուրս գալ FA Youth Cup-ի քառորդ եզրափակիչ (ՏԵՍԱՆՅՈՒԹ)

Հայաստանի երիտասարդական հավաքականի 18-ամյա հարձակվող Ֆինն Գերագուսյանը (Finn Geragusian) դուբլ ձևակերպեց և օգնեց «Սանդերլենդ U18»-ին 4:1 հաշվով վստահ հաղթանակ տանել «Բրայթոն U18»-ի նկատմամբ Անգլիայի երիտասարդական գավաթի 1/8 եզրափակչի խաղում։

Հանդիպումը կայացավ «Էփլթոն» մարզադաշտում և տանտերերի համար մեկնարկեց առավել քան հաջող։ Արդեն 27-րդ րոպեին «սև կատուները» առաջ էին անցել 3:0 հաշվով։ Հաշիվը հիանալի տուգանային հարվածով բացեց Թոմ Պրոկտորը։ Շուտով Մարկուս Նիլը կրկնապատկեց առավելությունը արագ կոմբինացիայից հետո, իսկ այնուհետև իր խոսքն ասաց Գերագուսյանը՝ հարմար պահի օգտվելով, հարվածեց դարպասաձողին, և գնդակը անդրադարձից հայտնվեց ցանցում։

Երկրորդ խաղակեսում «Սանդերլենդը» մնաց տասը հոգով՝ Չարլի Ֆորսայթը ստացավ երկրորդ դեղին քարտը։ «Բրայթոնը» Ադամ Բրետի ջանքերով կրճատեց հաշվի տարբերությունը, սակայն ինտրիգը երկար չպահպանվեց։ Գերագուսյանը առաջինը հասավ անդրադարձից հետո վերադարձած գնդակին և ձևակերպեց դուբլ՝ վերջնականապես հստակեցնելով հաղթողին՝ 4:1։

Երիտասարդ հայ հարձակվողի համար սա արդեն 11-րդ և 12-րդ գոլերն են ընթացիկ մրցաշրջանում։ Նա գոլ է խփում արդեն չորրորդ խաղում անընդմեջ։ Հատկանշական է, որ այս խաղից առաջ Գերագուսյանը գոլի հեղինակ էր դարձել նաև «Սանդերլենդ U21»-ի կազմում՝ հաստատելով իր գերազանց մարզավիճակը։

Քառորդ եզրափակչում «Սանդերլենդ U18»-ը կհանդիպի «Մանչեսթեր Յունայթեդ U18»-ին, որը 4:1 հաշվով հաղթել է «Օքսֆորդ Յունայթեդ U18»-ին։

ԳԵՐԱԳՈՒՍՅԱՆԻ ԳՈԼԵՐԻ ՏԵՍԱՆՅՈՒԹԸ՝