«Բորուսիա Մ»-ն փրկվեց խաղի ավարտին «Բայերի» դեմ, Ռանոսը դուրս եկավ փոխարինման

«Բորուսիա Մյունխենգլադբախը» անցկացրեց առաջին հանդիպումը Գերարդո Սեոանեի հեռացումից հետո։ Բունդեսլիգայի 4-րդ տուրի խաղում թիմը ղեկավարում էր գլխավոր մարզչի ժամանակավոր պաշտոնակատար Օյգեն Պոլանսկին, որը նախկինում աշխատել է երիտասարդական կազմում։

Նրա ղեկավարությամբ «Բորուսիա Մ»-ն 1:1 հաշվով ոչ-ոքի խաղաց «Բայերի» հետ։ Լևերկուզենը հաշիվը բացեց 70-րդ րոպեին՝ Մալիկ Տիլմանի գոլի շնորհիվ, սակայն 90+2-րդ րոպեին Հարիս Տաբակովիչը հավասարեցրեց հաշիվը անկյունայինից հետո։ Սա միայն երկրորդ միավորն էր մյունխենգլադբախցիների համար ընթացիկ մրցաշրջանում։

Թիմը խաղին դուրս եկավ նոր սխեմայով՝ երեք կենտրոնական պաշտպաններով։ Հայաստանի հավաքականի հարձակվող Գրանտ-Լեոն Ռանոսը մնաց պահեստայինների շարքում, չնայած Ֆրանկ Օնորայի և Ռոբին Հակի վնասվածքներին։ 22-ամյա ֆուտբոլիստը խաղադաշտ մտավ 86-րդ րոպեին և օգնեց թիմին կարևոր միավոր նվաճել արտագնա հանդիպմանը։