«Աթլետիկի» երկրպագուները աջակցել են Հայաստանին «Ղարաբաղի» հետ Չեմպիոնների լիգայի հանդիպումից առաջ

Հոկտեմբերի 22-ին Բիլբաոյում կայացավ 2025/26 մրցաշրջանի Չեմպիոնների լիգայի խմբային փուլի երրորդ տուրի հանդիպումը, որտեղ «Աթլետիկը» 3:1 հաշվով հաղթեց ադրբեջանական «Ղարաբաղին»։ Այս հաղթանակը բասկյան ակումբին բերեց առաջին միավորները ընթացիկ մրցաշարում։

Սակայն հանդիպման նկատմամբ ուշադրությունը պայմանավորված էր ոչ միայն սպորտային արդյունքով։ Խաղից առաջ «Աթլետիկի» երկրպագուները կազմակերպել էին ակցիա՝ ի պաշտպանություն Հայաստանի։ «Bira» մշակութային կենտրոնում անցկացվել է հանդիպում «Ոչ՝ Ադրբեջանի ռեժիմի սպիտակեցմանը» կարգախոսով, որը կազմակերպել էին երկրպագուների միավորումը՝ Iñigo Cabacas Herri Harmaila (ICHН)-ը և ինտերնացիոնալիստական կազմակերպությունը՝ Askapena-ն։

Ելույթ ունեցողները խոսել են Հայաստանի և Ադրբեջանի միջև հակամարտության արմատների մասին, հիշատակել Մոնթե Մելքոնյանին, դատապարտել սպորտի օգտագործումը քարոզչական նպատակներով և հայտնել համերաշխություն Արցախի ժողովրդին։

Բասկերեն գրություններով պաստառների վրա մասնակիցները իրենց բողոքն են արտահայտել Բաքվի քաղաքականության դեմ և ընդգծել իրենց աջակցությունը Հայաստանին․

• «ԲԱՍԿԵՐԻ ԱԶԳԸ ՄԻՇՏ ՀԱՅԱՍՏԱՆԻ ԿՈՂՔԻՆ Է։ ԹԵ ԱՊՐԻԼԻ 24-Ը, ԹԵ ՀՈԿՏԵՄԲԵՐԻ 22-Ը»

• «ԴԵՄ ՍՈՒՊԵՐԱԶԳԱՅԻՆԱԿԱՆՈՒԹՅԱՆԸ։ Բիլբաոն ասում է՝ ոչ ադրբեջանական սուպերազգայինությանը։ ԿԵՑՑԵ ԱԶԱՏ ԱՐՑԱԽԸ»

• «ԴԱԴԱՐԵՑՆԵՔ ԷԹՆԻԿ ԼՎԱԾՔՆԵՐԸ։ ԱԶԱՏՈՒԹՅՈՒՆ ԱՐՑԱԽԻՆ»

Այսպիսով, «Աթլետիկի» և «Ղարաբաղի» հանդիպումը դարձավ ոչ միայն ակումբի սպորտային պատմության կարևոր էջ, այլև երկրպագուների քաղաքացիական դիրքորոշման դրսևորում։

Աղբյուր՝ 301։