«Բուդուչնոստը» գնում է Աբովյան՝ հաղթելու մտադրությամբ

Հուլիսի 8-ին, երեքշաբթի օրը, Աբովյանում կկայանա Չեմպիոնների լիգայի որակավորման առաջին փուլի «Նոայի» ու Չեռնոգորիայի «Բուդուչնոստի» միջև հանդիպումը։ Հայաստանի չեմպիոնը կընդունի Պոդգորիցայից ժամանած հյուրերին, որոնք արդեն չարթերային չվերթով հասել են Երևան և հանդիպումից առաջ մարզում կանցկացնեն շուրջ 3500 հանդիսական տեղ ունեցող մարզադաշտում։

Խաղին կլինի անշլագ․ բոլոր տոմսերն արդեն վաճառված են։

Չնայած այն հանգամանքին, որ համարվում են աուտսայդեր, «Բուդուչնոստի» ֆուտբոլիստները պատրաստվում են կռվել։ Փորձառու հարձակվող Իգոր Իվանովիչը ակումբի մամուլի ծառայությանը տված հարցազրույցում նշել է.

«Ճանապարհ ենք ընկել պատրաստ ու առանց վնասվածքների՝ ինչը շատ կարևոր է։ Վերջին օրերին լսում ենք մեկնաբանություններ, թե իրենք մեզնից տաս անգամ ուժեղ են, բայց այդ կարծիքին չենք։ Մենք նրանց մանրամասն վերլուծել ենք՝ պետք է խոստովանել, որ նրանք իսկապես որակյալ են, սակայն անպարտելի չեն։ Մենք էլ ունենք մեր ուժեղ կողմերը ու չենք գնում հանձնվելու։ Ցանկանում ենք պայքարել, որովհետև այս ամբողջ ընթացքում չենք պատրաստվել ու մարզվել պարզապես հանձնվելու համար»։

Պաշտպան Ադնան Օրահովացն ընդգծել է, որ թիմը հավատում է իր ուժերին.

«Նոան ունի մեծ բյուջե, ներկայացնում է ավելի որակյալ լիգա, ակումբը մեծ աճ է ապրում, եվրագավաթներում արդեն խաղացել է, հաղթել ուժեղ թիմերի… Բայց դրա համար մենք սպիտակ դրոշ չենք բարձրացնելու։ Մենք գնում ենք պայքարելու՝ հստակ նպատակով՝ տալ ամեն ինչ ու ստանալ այնպիսի արդյունք, որը ռևանշի համար մեր առջև դուռ բաց կթողնի»։

Նրա խոսքով՝ Նենադ Լալատովիչի գլխավորությամբ մարզչական շտաբը մանրամասն վերլուծել է «Նոային».

«Մենք մանրակրկիտ վերլուծել ենք մրցակցին՝ շատ որակյալ թիմ է, բազմաթիվ լեգեոներներով, հատկապես վտանգավոր հարձակման գծում։ Հարձակումը հավանաբար նրանց ամենաուժեղ կողմն է, սակայն նաև կիսապաշտպանությունն ունի առանցքային դեր, իսկ հիմնական վտանգը գալիս է եզրերից։ Բայց վստահ եմ՝ ճիշտ տակտիկայի և նվիրումի դեպքում կկարողանանք դիմակայել բոլոր մարտահրավերներին»։

Իվանովիչն ավելացրել է, որ «Նոայի» հարձակողական ուժը նաև կարող է օգտակար լինել իրենց.

«Նրանք իսկապես ուժեղ հարձակում ունեն, հաճախ հարձակման ավարտական փուլում ներգրավվում են հինգ-վեց խաղացողներ, ինչը մշտապես վտանգ է ներկայացնում, սակայն այդ մոտեցումը բացատներ է թողնում պաշտպանությունում։ Եթե դա նորից տեսնենք՝ կփորձենք օգտագործել։ Մենք ունենք մեր գաղափարները և հույս ունենք՝ համապատասխան տարածքներ կբացվեն, որպեսզի կարողանանք սպառնալ "Նոային"»։

Չեռնոգորական թիմի ֆուտբոլիստները երազում են լավ արդյունքի մասին և հուլիսի 15-ին լեփ-լեցուն ստադիոնի՝ պատասխանի հանդիպման ժամանակ.

«Վստահ եմ՝ ամեն ինչ մեր ձեռքերում է։ Պետք է լինենք ամուր, ագրեսիվ, համախմբված… Մենք խոսում ենք իրար հետ ու հասկանում՝ պետք է կռիվ տանք խաղադաշտում, որպեսզի հայրենիք բերենք դրական արդյունք»։

«Եթե կարողանանք լավ արդյունք գրանցել՝ Գորիցայի ստադիոնը լեփ-լեցուն կլինի։ Երկրպագուները կգան՝ մեր պայքարը գնահատելու և մեզ աջակցելու համար։ Նրանց աջակցությունը կլինի լրացուցիչ մոտիվացիա՝ մի մեծ քայլ անելու և վերջապես հաղթահարելու Չեմպիոնների լիգայի որակավորման առաջին արգելքը։ Դա մեր բոլորիս նպատակն է՝ այդ պատճառով մեր ամբողջ ուշադրությունը ուղղված է առաջին հանդիպմանը», — ասաց Իվանովիչը։

Օրահովացն էլ եզրափակեց.

«Կարծում եմ՝ մեր շանսը այն է, որ նրանց հարձակվողներն այնքան էլ ակտիվ չեն պաշտպանությունում։ Այդ ուղղությամբ անպայման կաշխատենք։ Մենք ունենք հստակ ծրագիր և հավատ դրական արդյունքին։ Իսկ եթե Երևանում հաջողվի հասնել լավ հաշվի՝ Պոդգորիցայում կարող է տեղի ունենալ այն, ինչի մասին բոլորս երազում ենք։ Կանենք ամեն ինչ՝ ուրախացնելու երկրպագուներին, ովքեր նույնիսկ Երևանում մեր թիկունքում են լինելու»։

«Բուդուչնոստի» նախապատրաստությունը եվրագավաթներին անցել է Սլովենիայում, իսկ թիմի վերադառնալուց հետո ներքին տրամադրությունը էլ ավելի բարձրացել է։ Նոր գլխավոր մարզիչ Նենադ Լալատովիչն ու իր շտաբը սկսել են կառուցել իրենց համակարգը, իսկ ինչպես նշում են ֆուտբոլիստները՝ մթնոլորտը թիմում հրաշալի է։

Այդ մասին խոսեց հարձակվող Իվան Բուլատովիչը, որը ընթացիկ նախապատրաստական խաղերում լավագույններից մեկն էր.

«Թիմում իրավիճակն ուղղակի հիանալի է։ Գիտենք, որ մեզ բարդ խաղ է սպասվում Հայաստանում, սակայն հավատում ենք մեզ և հույս ունենք այնպիսի արդյունքի, որը մեզ խաղում կպահի մինչև պատասխան հանդիպումը։ Մեկնում ենք հստակ նպատակով՝ պայքարել ամեն գնդակի ու “Բուդուչնոստի” համար»։

Բուլատովիչը նախապատրաստական չորս խաղում երեք գոլ է խփել՝ «Վարդարի», Բուխարեստի «Ռապիդի», «Մուրայի» և «Սլավեն Բելուպոյի» հետ հանդիպումներում, ու մոտենում է «Նոայի» հետ հանդիպմանը հրաշալի մարզավիճակով.

«Մենք հիանալի հավաք անցկացրինք՝ լավ աշխատանք, որակյալ ստուգողական խաղեր, լուրջ մոտեցում։ Բավարարված եմ իմ մարզավիճակով․ չորս խաղում երեք գոլը կարևոր է վստահության համար։ Իսկ վստահությունն ինձ մոտ հիմա բարձր մակարդակի վրա է»։

Նա ճանաչում է, որ «Նոան» լուրջ մրցակից է.

«Շատ բան ենք լսել “Նոայի” մասին, նրանց ամենաուժեղ գիծը հավանաբար հարձակումն է։ Բայց մենք պատրաստ ենք ամեն ինչի։ Մեր ուժը թիմային ոգու մեջ է, և ես հավատում եմ, որ այս երկխաղյա պայքարում մենք մեր շանսերն ունենք»։

«Նոա» – «Բուդուչնոստ» հանդիպումը կկայանա հուլիսի 8-ին, ժամը 20:00-ին՝ Աբովյանի մարզադաշտում, որը նախատեսված է շուրջ 3500 հանդիսականի համար։ Պատասխան հանդիպումը տեղի կունենա հուլիսի 15-ին՝ Պոդգորիցայում։