Արթուր Ղարիբյանը վերադարձել է «Ռոդինա»

Հայաստանի երիտասարդական հավաքականի հարձակվող Արթուր Ղարիբյանը վաղաժամ լքել է «Սպարտակ Կոստրոմա»-ն և վերադարձել «Ռոդինա»։ Ակումբները որոշում են կայացրել վաղաժամ դադարեցնել վարձակալության պայմանագիրը։

19-ամյա հարձակվողը (հասակը՝ 191 սմ) Կոստրոմայի թիմի կազմում անցկացրել է 16 հանդիպում, որոնցում խփել է 5 գոլ և կատարել 2 գոլային փոխանցում։ Ղարիբյանը դարձել էր «կարմիր-սպիտակների» ամենանշանավոր խաղացողներից մեկը մրցաշրջանի առաջին հատվածում և պարբերաբար ընդգրկվում էր մեկնարկային կազմում։

Այնուամենայնիվ, առաջնության երկրորդ հատվածում «Սպարտակ Կոստրոմա»-ի մարզչական շտաբը մտադիր է վստահել ավելի փորձառու հարձակվողի՝ Ամուր Կալմիկովին, ով տեղափոխվել է Տուլայի «Արսենալ»-ից։

Ակնկալվում է, որ Ղարիբյանը մրցաշրջանը կշարունակի «Ռոդինա-2»-ի կազմում, որը հանդես է գալիս Երկրորդ դիվիզիոնում։ Միաժամանակ հարձակվողը հասանելի կլինի նաև «Ռոդինա»-ի հիմնական թիմի համար, որը խաղում է Առաջին լիգայում։ Սակայն այնտեղ կենտրոնական հարձակվողի դիրքում մրցակցությունը բավականին լուրջ է․ մարզչական շտաբի տրամադրության տակ արդեն կա այդ դիրքում հանդես եկող հինգ ֆուտբոլիստ։

Հիշեցնենք, որ ձմռանը Ղարիբյանին թույլ չտվեցին մեկնել «Բալտիկա» դիտման, որպեսզի նա շարունակի առաջընթաց գրանցել «Սպարտակ Կոստրոմա»-ում վարձակալությամբ, սակայն արդյունքում իրավիճակը նրա համար հաջող չդասավորվեց։

Ամեն դեպքում նա դեռ երիտասարդ է և անկասկած ապագայում հնարավորություն կստանա։