Հայ բռնցքամարտիկները ավարտել են իրենց ելույթները Բանգկոկում անցկացվող FUTURES CUP U19 մրցաշարում

Հայաստանի բռնցքամարտի հավաքականը ավարտել է իր ելույթները Բանգկոկում (Թաիլանդ) անցկացվող միջազգային FUTURES CUP U19 մրցաշարում, որը հանդիսանում էր 2026 թվականի Ամառային պատանեկան Օլիմպիական խաղերի ընտրական պարտադիր փուլերից մեկը։

Մրցաշարին մասնակցել են երեք հայ բռնցքամարտիկներ։

50 կգ քաշային կարգում Տիգրան Կիրակոսյանը իր առաջին մենամարտում պարտվել է Ուզբեկստանի ներկայացուցիչին և դուրս է մնացել հետագա պայքարից։

60 կգ քաշային կարգում Կարեն Զախարյանը հասել է մինչև 1/8 եզրափակիչ։ Այդ փուլ հասնելու ճանապարհին նա հաղթել է Եգիպտոսի և Ֆինլանդիայի ներկայացուցիչներին, սակայն հետո պարտվել է Ուկրաինայի բռնցքամարտիկին։

65 կգ քաշային կարգում Սուրեն Կատվալյանը նույնպես հասել է մինչև 1/8 եզրափակիչ։ Հայ մարզիկը մրցաշարը սկսել է հաղթանակով Սաուդյան Արաբիայի ներկայացուցիչի նկատմամբ, սակայն հաջորդ մենամարտում պարտվել է ԱՄՆ-ի բռնցքամարտիկին։

Նշենք, որ առայժմ անհայտ է՝ կկարողանա՞ն արդյոք հայ բռնցքամարտիկները մասնակցել 2026 թվականին Դակարում կայանալիք Պատանեկան Օլիմպիական խաղերին։ FUTURES CUP U19 մրցաշարը հանդիսանում էր ընտրական պարտադիր փուլ, սակայն մրցաշարի արդյունքներով լիցենզիաների տրամադրման չափանիշները դեռևս չեն հրապարակվել։

FUTURES CUP U19 մրցաշարը կավարտվի մարտի 15-ին։