Հայաստանի դպրոցական հավաքականը մտել է շախմատի աշխարհի առաջնության լավագույն տասնյակում

ԱՄՆ-ում ավարտվեց դպրոցականների թիմային աշխարհի առաջնությունը՝ World School Team Chess Championship 2025 (WSCT 2025), որը կազմակերպվել էր Միջազգային դպրոցական շախմատի ֆեդերացիայի (ISCF) կողմից՝ FIDE-ի և Freedom Holding Corp. ընկերության աջակցությամբ։ Մրցաշարին մասնակցում էին ավելի քան 50 թիմեր տարբեր երկրներից, որոնք պայքարում էին շախմատային աշխարհի էլիտայում տեղ զբաղեցնելու համար։

Հայաստանը ներկայացնում էր Գյումրիի «Ֆոտոն» լիցեյի թիմը, որը ցուցադրեց փայլուն արդյունք՝ զբաղեցնելով 7-րդ տեղը։ Այս հաջողությունը հատկապես արժեքավոր է՝ հաշվի առնելով մրցակիցների բարձր մակարդակը։ Հպարտության առիթ դարձավ նաև Աիդա Ալվանջյանի բրոնզե մեդալը 4-րդ խաղատախտակի վրա։ Այդ տախտակի ոսկին նվաճեց Հնդկաստանի թիմի Ա. Ռ. Իլամպարթհին, իսկ արծաթը՝ Տաջիկստանի ներկայացուցիչ Մուրոդալի Սաիֆիևը։

Կազմակերպիչները նշել են, որ 21-րդ դարում առաջնորդը ոչ միայն նա է, ով արագ է որոշումներ կայացնում, այլև կարողանում է տեսնել ամբողջական պատկերն։ Նրանց խոսքերով՝ շախմատը զարգացնում է հենց այդ որակները՝ պատճառահետևանքային կապերի կառուցում, ռիսկերի գնահատում, ուշադրության կենտրոնացում և թիմային աշխատանք։

ISCF-ի նախագահ Տիմուր Տուրլովը ընդգծեց, որ շախմատը պետք է դառնա ժամանակակից մարդու «երկրորդ գրագիտությունը»՝ կարդալու և գրելու հետ միասին։ Նա նշեց, որ Հայաստանում արդեն ներդրվում է շախմատի ուսուցումը դպրոցներում, իսկ թիմի միջազգային հաջողությունը դրա արդյունավետության վառ ապացույցն է։

WSCT 2025-ի համաշխարհային հաշվարկում առաջին տեղը զբաղեցրեց Հնդկաստանի հավաքականը, երկրորդը՝ Ղազախստանը, երրորդը՝ ԱՄՆ-ը։ Ավելի քան հիսուն ուժեղագույն դպրոցական հավաքականների մեջ հայաստանյան թիմի տեղը լավագույն տասնյակում ազդակ դարձավ, որ ազգային շախմատային դպրոցը շարունակում է պահպանել բարձր մրցունակությունը, իսկ երիտասարդ հայ շախմատիստները պատվով ներկայացնում են երկիրը աշխարհում։