Արման Հարությունյանը դարձել է ազատ ոճի ըմբշամարտի Մ23 Եվրոպայի առաջնության բրոնզե մեդալակիր
- Հեղինակ: Vahe Hakobyan
- Sportaran
19-ամյա հայ ըմբիշ Արման Հարությունյանը (57 կգ) դարձել է ազատ ոճի ըմբշամարտի մինչև 23 տարեկանների Եվրոպայի առաջնության բրոնզե մեդալակիր։ Մրցաշարը անցկացվում է Սերբիայի Զրենյանին քաղաքում։
Երրորդ տեղի համար գոտեմարտում Հարությունյանը վստահ և ժամանակից շուտ հաղթեց Բելառուսի ներկայացուցիչ Արտյոմ Պավլյուչենկոյին՝ 10:0 հաշվով։
Հայ ըմբիշի համար մրցաշարը սկսվել էր որակավորման փուլում կրած պարտությամբ Ռուսաստանի ներկայացուցիչ Այանդայ Օնդարից՝ 5:7 հաշվով։ Սակայն Օնդարը հասավ եզրափակիչ, ինչի շնորհիվ Հարությունյանը հնարավորություն ստացավ շարունակել պայքարը սփոփիչ գոտեմարտերում։
Սփոփիչ փուլում հայ մարզիկը նախ վստահ հաղթեց ուկրաինացի Նիկոլայ Բրատովին՝ 16:5 հաշվով, իսկ հետո բրոնզե մեդալի համար պայքարում խոշոր հաշվով՝ 10:0, հաղթեց բելառուս Պավլյուչենկոյին։
Հարությունյանի համար սա առաջին ելույթն էր մինչև 23 տարեկանների մակարդակում։ Ավելի վաղ նա դարձել էր մինչև 17 տարեկանների Եվրոպայի առաջնության արծաթե և աշխարհի առաջնության բրոնզե մեդալակիր։
Այս մրցանակը դարձավ Հայաստանի հավաքականի առաջին մեդալը Զրենյանինում անցկացվող Մ23 Եվրոպայի առաջնությունում։ Միևնույն ժամանակ մրցաշարը հայկական թիմի համար դեռ չի ավարտվել․ առջևում երկու բրոնզե մեդալի գոտեմարտեր, երկու սփոփիչ փուլ և եզրափակիչ՝ Լևիկ Միքայելյանի մասնակցությամբ։
Քննարկեք նորությունները!
Անցնել մեկնաբանություններին ↓
Comments
0