«Ալաշկերտը» Գյումրիում հաղթեց «Շիրակին» և ամրապնդեց իր առաջատարի դիրքը

Fastex Պրեմիեր լիգայի 2025/26 մրցաշրջանի 10-րդ տուրի մեկնարկային խաղում «Ալաշկերտը» Գյումրիում 2-1 հաշվով հաղթեց «Շիրակին»։

Վահե Գևորգյանի գլխավորած թիմը հանդիպումն սկսեց ակտիվ և արդեն 2-րդ րոպեին Մոմո Տուրեն բացեց հաշիվը։ 23-րդ րոպեին Կայո Էնրիկեն կրկնապատկեց հյուրերի առավելությունը՝ հաջող ավարտին հասցնելով գեղեցիկ գրոհը։

«Շիրակը» կարողացավ նվազեցնել հաշվի տարբերությունը երկրորդ կեսում․ 63-րդ րոպեին Ռաֆիկ Մինասյանը հստակ իրացրեց 11 մետրանոց հարվածը։ Սակայն գյումրիացիները չկարողացան ավելին անել, իսկ հիմնական ժամանակի ավարտից մեկ րոպե առաջ Դոնալդ Կոդիան կոպիտ խախտման համար ստացավ ուղիղ կարմիր քարտ և լքեց խաղադաշտը։

Այս հաղթանակի շնորհիվ «Ալաշկերտը» վաստակեց 22 միավոր և շարունակում է վստահ առաջատար մնալ Fastex Պրեմիեր լիգայի մրցաշարային աղյուսակում։ «Շիրակը» 6 միավորով զբաղեցնում է 8-րդ տեղը։