15-ամյա Հանա Մարիա Աբոյանը դարձավ աշխարհի պատանեկան չեմպիոն սառցային պարերում

7 մարտին Տալլինում ավարտվեցին 2026 թվականի պատանեկան գեղասահքի աշխարհի առաջնության սառցային պարերի մրցումները։ Մրցաշարի ոսկե մեդալները նվաճեց ամերիկյան զույգը՝ Հանա Մարիա Աբոյան / Դանիիլ Վեսելուխին, որը վստահ ելույթ ունեցավ երկու ծրագրերում։

Գեղասահորդները առաջին տեղը զբաղեցրին կարճ ծրագրում, ապա հաստատեցին իրենց առաջատարությունը ազատ ծրագրում՝ ընդհանուր հավաքելով 166.71 միավոր և դառնալով պատանիների աշխարհի չեմպիոններ։

Արծաթե մեդալները բաժին հասան ֆրանսիական զույգին՝ Պերյե Ժիանեսինի / Բլան Կլապերման, որոնք հավաքեցին 164.88 միավոր։ Երրորդ տեղը զբաղեցրին Ուկրաինայի ներկայացուցիչներ Պիդհայնա / Կովալ զույգը՝ 164.32 միավորով։

15-ամյա Հանա Մարիա Աբոյանի համար, ով ունի հայկական արմատներ, այս հաղթանակը դարձավ աշխարհի առաջնություններում նրա կարիերայի առաջին տիտղոսը։ Գեղասահորդուհին ծնվել է ԱՄՆ Նյու Հեմփշիր նահանգի Լիբանան քաղաքում։ Հետաքրքիր է, որ նա գեղասահքի աշխարհ է եկել պատահաբար․ մանկության տարիներին Հանա Մարիան դիտել է «Frozen» մուլտֆիլմը, որտեղ նրան հատկապես տպավորել է սառույցի վրա սահելու տեսարանը։ Ավելի ուշ նա տեսել է գեղասահքի դպրոցի գովազդային բուկլետը և համոզել ծնողներին իրեն գրանցել մարզումների։

Նրա գործընկեր Դանիիլ Վեսելուխինը ծնունդով Կիրովից է։ Նա երկար ժամանակ մարզվել և հանդես է եկել Ռուսաստանում, իսկ հետո շարունակել կարիերան ԱՄՆ-ում։

Հարկ է նշել, որ Տալլինում անցկացված պատանեկան աշխարհի առաջնությանը մասնակցել են նաև Հայաստանի ներկայացուցիչները։ Տղամարդկանց մենասահքում Միքայել Սալազարյանը զբաղեցրել է 32-րդ տեղը, իսկ կանանց մրցաշարում Իզաբելա Եսայանը դարձել է 43-րդը։